Mizoram-ah Fentanyl lalut an la awm lo; Ruihhlo dona ah mipuite kan tanrual a ngai - END Minister

Excise & Narcotics Minister Er. Lalrinawma chuan tunhnaiah Social Media-ah ruih nana hman chi damdawi hlauhawm bik, Fentanyl Mizorama lut anga sawi awm chu enfiah leh zirchian anih hnuah lalut an awm rihloh thu sawiin, ruihhlo dona kawngah Zoram mipuite kan tanrual a ngai takzet tih a sawi.

Nimin-a mipuite hnena thuchah a sawiah Excise Minister Er. Lalrinawma chuan tunhnaia Zombie Drug, Fentanyl leh tunlai ruihlo (New Psycho Active Substance-NPS) khawthlang ram ten an buaipui em em thinin Mizoram a lo lut tawh nia sawi leh Mizo thalaite zingah a hmang sual an awm ni a sawi chu Excise & Narcotics Department chuan rang taka chhuiin a zir chiang nghal tih a sawi a, “He thuthang hi a diklo a ni tih April 6, 2023 (Ningani) khan finfiah nghal a ni,” a ti a. Tunhnaia Social Media-a video clip pakhat a mi pahnih lo lang ten Fentanyl an rui ni a ngaih theih tur a sawi awm chu zirchiangin, anmahni ngei pawh kawm an nih thu leh anni chuan he damdawi Fentanyl hi a hming pawh an la hriat ngai loh thu leh a hmuh pawh an la hmuh ngai loh thu an sawi a, video-a lak an nih ni hian Heroin leh drugs dang chi 3, tualchhunga hmuh mai theih chawhpawlhin an rui tih a sawi bawk.

Excise Minister chuan ruihhlo leh a kaihhnawih harsatna-in Mizoram a run nasa hle tih sawiin, tun dinhmunah ruihhlo ngai enkawlna Centre leh damdawi In 48 vel a awm mek tih a sawi a, heng zingah hian Centre 11 chu IRCA (Integrated Rehabilitation Centre for Addicts) a nih thu te, De-addiction Centre 11-ah hian April, 2022-March, 2023 chhungin mi 1,006 an enkawl thu leh Counselling vawi 16,920 pek a nih thu te a sawi a, heng an enkawl zingah hian HIV+ mi 311 an awm thu sawiin, Ministry of Social Justice & Empowerment hmalakna in Nasha Mukt Bharat Abhiyaan (Drug Free India Campaign) chu India ram chhunga District 372 ah kalpui mek a nih thu a sawi a, Mizoram-ah pawh District 3 -ah kalpui a nih thu a sawi a. Heng District pathum-ah te hian Nasha Mukt Bharat Abhiyaan kaltlangin thalai 139,335 hnena hma an lak tawh thu a sawi bawk a. Kum 10 -17 inkar naupangte ruihlo chungchanga zirchianna 'Drug and Children Survey in Mizoram 2022' neih a nih thu sawi bawk.

Ruihhlo dona atana Committee lo awm tawh sa chu Chief Minister Zoramthanga hmalakna in thar thawh leh a nih thu Minister chuan sawiin, he Ruihhlo Do Committee in chak zawka hma a lak theih nan Chief Minister, Finance Minister ni bawk chuan cheng vbc. 3 hman a phal sak thu leh tunah pawisa hi sanctioned tawh a ni tih a sawi a. He Committee hian Supply Reduction, Demand Reduction leh Harm Reduction chak zawka kalpui tumin Mizoram pumah hma a la mek tih sawiin, District tinah Deputy Commissioner Chairman na hnuaiah District Level Task Force din a ni a, anni kaltlang hian District leh Village Level-ah ruihhlo dona kawngah hma chak taka lak an tum a nih thu a sawi bawk.

Er. Lalrinawma chuan Mizoram mipui te'n ruihhlo dona kawngah mit leh beng kan chhi tlang zel chu thil lawmawm tak a ni tih pawh sawiin, Ruihhlo dona kawnga tha thawhtute tha tichak a, a tulna apianga tawiawm zel turin Mizoram mipuite a chah thar leh a. Chutih rualin, thil a nihna tak hrechiang hmasa lo a mipui ti chi-ai thei zawng a thu thehdarh mai lo a, a zirchiang theitu leh hma la theitute hriattir hmasa zel turin mipuite a ngen bawk a ni.