Kuhva hnah hmanga Thleng siamna tur hawng

LAD Minister K. Lalrinliana chuan nimin khan Bilkhawthlir khua ah Kuhva hnah hmanga Thleng siam chhuahna hmun, ‘Arecanut Leaf Plate Production Centre’ chu a hawng.

Local Administration Department hnuaia Rashtriya Gram Swaraj Abhiyan kaltlang a sak Arecanut Leaf Plate Production Centre hawnna hunah hian LAD Minister chuan Kuhva chin nana hmun tha tak, kuhva hmun enkawlna kawngah pawh tawnhriat nghah tawh tak Bilkhawthlir-a Kuhva hnah hmanga Thleng siamchhuahna hmun hawn theih a ni chuan intodelhna kawngah hmasawnna a thlen ngei a beisei thu a sawi a. Vawi khat hman plastic tihrem nan leh Bilkhawthlir Self Help Group member-ten eizawnna ngelnghet an neih theih nan ‘Arecanut Leaf Plate Production Centre’ chu hmang tura duhsakna hlanin, chutih rual chuan tehfung hrang hrang leh a man chhiar chungchangah te ram dang siam el pha tura tan la turin a chah bawk.

LAD Minister chuan hlawhtlin tum a tihtak zetna leh tumruhna nena bei tak takte tan hna thawh sen loh a awm thu sawiin, mahni tlin tawk leh theih tawk ang zela hmalak a pawimawh thu a sawi a. Mizoram Sawrkarin Food, Civil Supplies & Consumer Affairs Department kaltlanga ramchhung ngei a tharchhuah buhfai lei tur a duh thu leh Bilkhawthlir khua tharchhuah buhfai quintal 23 lei sak tawh a nih thu a sawi bawk.

Rashtriya Gram Swaraj Abhiyan (RGSY) kaltlanga cheng nuai 43 hmangin Arecanut Leaf Plate Production Centre, Bilkhawthlir hi December ni 6, 2021 khan sak tan a ni a. A In hi chhawng hnih niin Square feet 930 a zau a ni a, January ni 25, 2023 khan sak zawh niin tuna khawl awm mek hmang hian kuhva plate chi 6 a siam theih a ni.