Khawthlangtuipui Transport project atan cheng vbc. 22.90 sanction fel a ni tawh

Khawthlangtuipui Transport Project atan cheng vbc. 22.90 sanction fel tawh niin Tender pawh tihfel tep a ni tawh.

SEDP sum cheng nuai 270 senga sak Commercial Vehicle Terminal Building, Tlabung hawnna nimin-a neih ah he thu hi Transport Minister TJ. Lalnuntluanga chuan sawiin, Transport Department hmalaknain sawrkarin kan lui hmanga transport kalpui theih dan tur 'Inland Water Transport Project' lian tham tak a ruahman mek thu leh Central Sawrkar kaltlangin Khawthlangtuipui Transport Project atan cheng vbc. 22.90 sanction fel tawh niin Tender pawh tihfel tep a nih tawh thu a sawi a, he Project kaltlang hian hmasawnna leh employment tam tak hmuh a ni dawn tih sawiin, hemi bakah hian Tuichawng, Darzo to Chhimtuipui-ah te Techno Feasibility Survey zawhfel tawh niin Mizoram hmun hrang hrangah Inland Water Transport hi lian tham taka kalpui zel tum a ni, a ti bawk.

Transport Minister chuan Mizoram khaw pawimawh leh kan kawtchhuah hmasa Tlabung-ah Commercial Vehicle Building tih hlawhtlin a ni chu lawmawm a tih thu leh Tlabung leh a chhehvel economy tih hmasawnna kawnga hmanraw pawimawh tak ala nih chhoh ngei a beisei thu a sawi a. Tlabung leh a chhehvel khuate sawrkar in a ngai pawimawh takzet tih sawiin, RD Block hawn thar, NH-302 laih mek, MRB Branch hawn thar, Commercial Vehicle Building thar, Border Trade hmalakna, Inland Water Transport hmalakna te chhawr tangkaia hmasawnna tlo leh daih rei nei thei tura hma la turin mipuite a chah bawk.

Tlabung-a Commercial Vehicle Terminal Building hawnna hun hi Lunglei DTO Vanlalchhuanliana chuan kaihruaiin khualzahawm Principal Secretary, Transport Department KT. Beicho IRAS chuan Mizoram tana khaw pawimawh Tlabung khua in Commercial Vehicle Terminal Building thar an nei chu lawmawm a tih thu a sawi a. Khawvel history kan enin Civilization ropui tak tak te lui kam-ah an in tan thin thu leh Inland Water Transport leh Indo-Bangladesh Border trade hmalakna te kaltlangin Tlabung chu sumdawnna hmunpui pawimawh tak ala ni chho leh zel dawn a ni, a ti. West Tuipui bialtu MLA Nihar Kanti Chakma pawhin a bial chhunga hmasawnna ruhrel thar pawimawh tak hawn a ni thei ta chu lawmthu sawiin, Tlabung leh a chhehvel khua mipuite tana hmasawnna tam tak thlentu anih ngei a beisei thu a sawi bawk.