Central YMA in Court rorelna leh Corruption buaipuitu Special Judge thuremna lawmawm an ti

Central YMA chuan Court rorelna leh Corruption buaipuitu Special Judge thuremna lawmawm an tih thu sawiin, kan ram leh hnam tana an hnathawh zelna ah an thlawp tlat zel dawn tih an sawi a. Eirukna leh hlemhletna a reh theih nana hmalak an rel tawh angin hmalatu tur Committee din a nih thu tarlan a ni bawk.

YMA Rorelna sang ber dawttu Central Coordination Committee (CCC) thutkhawm vawi 96-na chu nimin khan Aizawl-ah neih niin YMA Rorel Inkhawm vawi 3-na, October ni 27, 2022-a Thingsulthliah Khelmual-a neih in ‘Eirukna leh hlemhletna a reh theih nan Central YMA-in tun aia chak zawkin hma la rawh se,’ tia a lo rel tawh bawhzuina thlirletin hmalakna te an thlir a. Hemi hnua thuchhuah an siamah Central YMA chuan Mizoram chhunga eirukna leh hlemhletna a reh theih nan Sub-Hqrs./Group/Branch YMA ten an huamchhungah chak zawka hmalak zui zel nise tiin, “Kut tling lova sum la lut leh thawhchhuah phu lova khawsate endawng thiam nise,” an ti a. Eirukna leh hlemhletna chungchanga Court rorelna leh Corruption buaipuitu Special Judge thuremna chu lawmawm an tih thu pawh sawiin, “Kan ram leh hnam tana a hnathawh zelna ah Court leh Special Judge-te YMA chuan a thlawp tlat zel dawn a ni,” an ti bawk.

Hei bakah hian CCC Meeting chuan, ‘Mizoram chhunga Hnamdang hnena In hmun, huan lo ram lei leh hralh emaw, hlan chhawn zel emaw a nih loh nan Mizoram chhunga In hmun/huan/lo/ram hralh leh hla chhawn a nih dâwn reng rengin YMA hriatpuina telh zel a nih theih nan Central YMA in hma la rawh se,’ tih pawh chak taka hmalak zui zel ni se, Central YMA-in sawrkarah RTI Dan hmangin Mizoram chhunga hmun leh hma te hnamdang in an neih tawh dan zawt chiang se, dan hman lai, Revenue Act 2013 pawh chiang zawka zirchian ni se, an ti. 

Sawrkar khawih zingah, Mizoram in Market Regulations a neih chu a taka hman a nih theih nana hmalak te, Mizoram hmun hrang hranga sawrkar damdawi In te hmanraw tha zawk leh thawktu tam zawkin thuam tha rawh se tih chungchang bakah Mizorama Vocational Course zirna tun aia uar zawka kalpui dan tur te rel a ni a. Myanmar atanga raltlan te hmun hrang hranga an awm darh lutuk chuan harsatna lian zawk la thlen thei dawna a lan avangin sawrkarin Relief Camp changtlung zawk siam tur leh chumi-ah chuan dah vek tura sawrkar lama chak zawka hma la tura sawrkar nawr chhunzawm zel nise an ti bawk a ni.

Nimin-a CCC thukhawm chuan YMA Rorel Inkhawm in a lo passed tawh YMA khawih hrang hrang zingah, ‘YMA General Conference’ tih thin chu ‘YMA Inkhawmpui Lian’ tia hming thlakin YMA Dan Bu ennawn (2022)-ah pawh dah fel a ni tawh thu thuchhuah an siamah an tarlang a. Central YMA-in ‘Theka Rate’ a siam chu hman a nih theih nan Aizawl khawpui chhungah hmalak zel nise, Sub-Hqrs. YMA ten an huamchhung District theuhah an hman turin lo zir chiang ve thuai se an ti bawk a. YMA Inkhawmpui Lian vawi 74-na kumin-a Biate-a neih tur chu October 24-26, 2023-ah neih nise tia CEC in a lo rel tawh chu CCC chuan an pawm bawk a ni.

Central Coordination Committee (CCC)-ah hian Central YMA OB leh Central Executive Committee (CEC) te bakah Sub-Headquarter YMA atangin mi 6 te, Group YMA aiawh mi 2 leh Aizawl khawpui chhung Branch YMA aiawh mi pakhat theuh te palai ni thei an ni a. Tun tum CCC ah hian mi 224-in ro relin Serchhip Sub-Hqrs. atang pawhin Sub-Hqrs. YMA hruaitute an tel a ni.