DoNER Minister of State hovin hmalakna thlirho

Mizoram chhunga DoNER Ministry hnathawh chi hrang hrang thlirhona hun chu nimin khan Ministry of Development of North Eastern Region (DoNER) enkawltu Minister of State BL. Verma hovin Chief Minister’s Conference Hall-ah neih a ni.

DoNER Minister of State hova hmalakna thlirhona hunah hian Minister of State BL. Verma chuan India hmarchhak hmasawnna atan sawrkar laipuiin theihtawp a chhuah thu sawiin, Prime Minister in a ngaih pawimawh avangin kumtin hmarchhak tihhmasawnna tur sum pawh tihpun zel a nih thu a sawi a. Inkalpawhna kawng leh hmasawnna ruhrel lian tak tak siam zel a nih thu pawh sawiin, a tul angin hmalak belh zel a nih thu a sawi bawk.

He hunah hian Chief Minister Zoramthanga pawhin Mizoram-a DoNER Ministry hnuaia hmalakna chi hrang hrangte chu tha taka tihhlawhtlin vek a nih tur thu sawiin, North East Road sector Development Scheme (NERSDS) hnuaia Mizoram-in project pali a neih zinga 3 chu Mizoram PWD in an thawk tih a sawi a, BRO in project pakhat an chan chu tun thlengin bul an la tan theih loh avangin hmasawnna a tikhawtlai thei dawn niin a sawi a, Mizoram PWD kut a hlanchhawng mai turin Minister hnenah hian rawtna a siam a ni.

Tun dinhmunah Mizoram chhungah DoNER Ministry project hrang hrang 76 kalpui mek a awm a, Planning & Programme Implementation Department official ten powerpoint presentation heng hmalakna hrang hrang dinhmun te hi an tarlang a. He hunah hian State Planning Board Vice Chairman H. Rammawi, Finance Principal Secretary Vanlalchhuanga, Secretary to CM K. Lalthawmmawia bakah DoNER Ministry hnuaia project khawih department aiawhte an tel a ni.