EF&CC Minister in Kolasib-ah building thar hawng

Environment, Forest & Climate Change Department changtu Minister TJ. Lalnuntluanga chuan nimin khan Kolasib-ah Conservator of Forest (Northern Circle) Office leh Quarters chu Project Veng, Kolasib-ah a hawng.

Heng building thar hawnna hunah hian EF&CC Minister chuan ram leilung humhalhna turin EF & CC Department chuan dan hrang hrang a kenkawh thin thu leh Dan bawhchhia te chunga hremna lekkawh a ngaih thin thu sawiin, dan hnuaia phalna nei te, zawm tur ang tha tak a zawm te tan harsatna a awm ngai loh thu a sawi a. Chhuan lo la awm leh zel tur te tan ram leilung hausakna humhalh chu mi tin mawhphurhna a nih thu a sawi bawk. Mizoram chhung a Forest Division 5-ah Green India Mission kalpui mek a nih thu Minister chuan tarlangin, Forest Division zawng zawngah kalpui a nih theih nan hmalak mek a nih thu a sawi a. Ramngaw humhalh nana Nagar Van Scheme hnuaia ruahmanna te, CAMPA hnuaia hmalakna leh tuihna humhalhna tura JICA nen ruahmanna siam mek a nih thu te a sawi bawk.

Kolasib DFO Margaret Lalramchhani IFS in he huna a tarlan danin kum 1984 July thla khan Mizoram-a Forest Division awm zawng zawng chu Directorate hnuaia awm niin July ni 13, 1984 khan Conservator of Forest (Northern Circle) hi siamin a thuthmun (Hqrs) atan Aizawl ruat a ni a. Chumi rual chuan Director of Forest post chu Conservator of Forest (Southern Circle) post a siamrem niin a thuthmun ah Lunglei ruat a ni a. Conservator of Forest (Northern Circle) Office chu November ni 19, 1985 khan Aizawl-ah kalpui tanin Dec. 13 khan Conservator of Forest (Southern Circle) Office pawh Lunglei-ah kalpui ve nghal a ni. Conservator of Forest (Northern Circle) hnuaiah hian Division paruk – Aizawl, Champhai, Mamit, Kawrthah, Kolasib leh Darlawn Forest Division-te awm thinin kum 1991-a Division hawn thar, Thenzawl Forest Division pawh a tel nghal a. July 3, 2003 khan Conservator of Forest (Central Circle) chu CF (Northern Circle) atanga indangin Kolasib, Darlawn leh Kawrthah te a bial a, kum 2010 August ni 13 khan Central Circle hnuaia awm Mamit Division chu Northern Circle hnuaiah behtir a ni bawk.

November 10, 2014 khan CF (Northern Circle) Hqrs. chu Aizawl atanga Kolasib a sawn phalna chhuah niin hma lak nghal a ni a. Chung hmalakna avang chuan cheng nuai 30 seng a sak Office of the Conservator of Forest, Northern Circle; Cheng nuai 20 seng a sak Conservator of Forest Quarters leh cheng nuai 20 seng a sak Conference Hall-te hi hawn a ni ta a ni.