Zan khat tang-a cheng nuai 4 chawi turin hrem

Mizoram KVI Board CEO hlui Lalsawmzuala chu Pawisa hman khawloh leh sawrkar lehkha pawimawh tih dik loh leh lehkha dik lo siam thu-a Court-in thiamloh a chantir hnuah Zan khat lung In-ah tangin cheng nuai 4 chawi tura chhuah a ni.

Prevention of Corruption Act Special Judge Court, Dr. HTC. Lalrinchhana chuan niminpiah a thiam loh a lo chantir tawh KVI Board CEO hlui, Lalsawmzuala hrem a nih dan hi nimin khan puangin niminpiah-a thiamloh chantir a nih thu puan a nih avanga Jail-a khung a nih hnua zan khat a tan bak chu tan belh tawh lova cheng nuai 4 chawi turin a chungthu a rel sak a, a sum chawi tur hi a pe thei lo a nih chuan kum 2 dang a tan belh a ngai dawn thung a ni.

Nimin-a Court in thuremna a tihchhuah-ah hian Lalsawmzuala'n sum a tichingpen ni-a sawi hi aman a neih leh neih loh finfiahna a awm loh bakah amah hi kum upa tawh tak, hriselna tha tawh lo a ni a, lung In-a rei tak dah tur chi a ni tawh lo a. Tunhma in eiruk kaihhnawih thubuai-ah thiam loh chan tir a la ni ngai loh avangin hrem a nihna hi tihnep sak a nih thu Court chuan a tarlang a ni.

Tarlan tawh angin Lalsawmzuala thubuai ngaihtuahtu, Prevention of Corruption Act Special Judge Dr. HTC Lalrinchhana’n Court thutlukna hi niminpiah khan puangin, dikhlel taka pawisa hman khawloh leh sawrkar lehkha pawimawh tih dikloh leh lehkha dik lo siama puhna te chu finfiah a nih avangin Section 409 IPC leh section 477A IPC angin thiam loh chantir a ni a. Hetihlai hian Lalsawmzuala hian inbumna leh dawt hmanga pawisa a dawn thu leh amah emaw midang tu emaw bil tana pawisa a eiruk leh hlepruk thu-ah erawh dan anga finfiah zawh a nih loh avangin thiam a chang thung a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar