Cyber Crime thubuai 70% sum kaihhnawih a ni; Police-in fimkhur turin mipui chah

Mizoram-a Cyber Crime lama mi sualten an bumna zinga 70% chu sum leh pai kaihhnawih a ni a, Mi sualten bumna chi hrang hrang an hman mek laka fimkhur turin Mizoram Police chuan mipuite an ngen nawn leh.

Cyber Crime Police hotute sawi danin mi sualte hian inbumna hi an la kalpui reng a, fimkhur tura Police-in thuchhuah an siam chungin bum theih an la nei reng a, complaint lut pawh a awm reng a. Tunhnaiah Internet kaltlanga inbumna a hluar hle a, heng inbumna hrang hrang zingah hian Sipai Officer anga inchhala an thlalak, ID leh a dangte daha mi bum ching an tam hle niin a sawi a. Heng mite hian bungraw hrang hrang - Motor, Bike, inchhung bungrua te zuarin, a man an dawn hnuah an bungraw zawrhte a leitu hnen thlen lovin an bibo thin a ni. Heng mi bum chingte hian sipaiho tana ei tur (Sangha, Sa chi hrang hrang, Cake leh theite) order derin a zuartute an bum thin bawk, an Order man pekna turin a zuartute hnenah QR Code scan-tirin a zuartute pawisa an lakchhuahsak thin a ni.

Hetiang hian mi tam tak an bum mek thu Police thuchhuah chuan a tarlang a. “Hriat tur pawimawh tak chu kan account-a pawisa lo lut turin 6 digit UPI PIN GPay, BHIM-ah pek a ngai lova, heng PIN pek ngai titu chuan bum a tum che tih hriat tur a ni,” an ti.

Hei bakah hian Company lem siam chawpin mi tam tak chu bum an nih thu sawiin, online hmanga be tlangnel hmasain a hnuah thil thawn tur anga insawiin an pawisa te an laksak thin a. Bank-a thawk anga insawiin loan buaipuina (processing fee, convenience fee etc.) a ngai tia sawiin, sum an laksak thin bawk a. Mi sual thenkhat chuan Video Call hmangin an saruak leh taksa dang langten an awmtir a, heng mite blackmail lehin pawisa an pek loh chuan an Video-te mipui hmaa phochhuaha vaute pawh a tam hle niin an sawi a. Bank-a thawk anga insawia an ATM Pin etc. diltute chu mi sual an ni tih hre tur leh online hmanga pawisa hmuhna tawktarh laka fimkhur turin mipui an ngen tih an sawi a ni.