Dan lova sumdawng dawr 85 chhinchhiah tawh

Central YMA chuan insakna bungrua (Cement leh Iron Rod etc.) zuar bikah Mizo hming hawha sumdawnna kalpui dawr 85 a chhinchhiah tawh a, inchin fel hun atan April 10, 2023 atanga chhiara ni 30 chhung hun pek mek an ni.

Central YMA chuan April 10, 2023 chawhnu khan Central YMA Hall-ah Insakna bungrua (cement, iron rod, brick etc.) zuartute kokhawmin Hnamdang, Mizo hming hawha sumdawngte leh Mizo, sumdawnna atana an hming hnam dang hawhtirtute chu April 10 atanga chhiara ni 30 chhunga inching fel ngei turin an ngen a. Central YMA in hemi chungchanga hma a lakna ah hian Central YMA President R. Lalngheta chuan Aizawl chauh ni lo, Mizoram hmun hrang hrangah hnamdang dawr a tam chak tih sawiin, Mizo mipuite tanrual a ngai takzet tih sawiin, inchinfelna hun ni 30 chhung an pekin awmzia a nei turah an ngai a, an inching fel lo a nih chuan Central YMA-in hmalakna a kalpui nghal dawn a, lo tang deuhte an awm a nih chuan a hrechiang bertu, an awmna Vengchhung mite nen tangrualin hmalak a ni anga, a tul a nih chuan an Bank Transaction thleng pawha en a ni ang.

Central YMA President R. Lalngheta chuan tuna hma an lakna chu In sakna bungrua Cement leh Iron Rod etc. dawr bik chauh a la ni tih sawiin, an hriat theih chinah Mizo hming hawha sumdawng leh Mizo, sumdawnna atana hnamdang an hming hawhtir dawr 85 an chhinchhiah thu leh an hriat loh pawh awm tura an ngaih thu a sawi a, tuna hma an lakna bakah hian sumdawnna dangah pawh a tahtawla hmalakna an kalpui zel dawn niin a sawi a. “Aizawl mai bak hmundangah pawh hnamdang dawr a tam chak hle a, hemi chungchangah hian Mizo mipuite kan tanrual a tul takzet a ni,” a ti bawk.