Cheng nuai 240 senga sak Serchhip DTO Office building thar Transport Minister in a hawng

Cheng nuai 240 senga sak Serchhip Darnam Tlang-a District Transport Officer (DTO) Office Building chu nimin khan Transport Minister TJ. Lalnuntluanga chuan a hawng a, DTO Office-a thawktute chu mipui ten an dawr thin an nih avangin mipuite tan an inhawn a tul thu a sawi a ni.

Serchhip Darnam Tlang-a Serchhip DTO Office thar hawnna hunah hian Transport Minister TJ. Lalnuntluanga chuan Serchhip-ah hmasawnna tam tak a lo awm tawh thu sawiin, tuna sawrkar lai a lo din hnuah pawh hna tam tak thawkin hmachhawp pawh tam tak a awm thu a sawi a. Tuna Mizoram-a Ministry ding mek a lo pian hnu kum 2019 chho-ah Serchhip-a DTO Office Building-a hman thin chu enfiah a nih thu leh a chhiat em em avangin Building tharr sa tura hmalak a nih thu leh theihtawp an chhuah hnuah a hlawhtlinna hmuh theih a ni ta chu lawmawm a tih thu a sawi a, “A hmunhma min petu Darnam Veng khawtlangte chungah lawmthu kan sawi a, a sak chhunga Darnam VC ten min puih nasatziate kan hrereng a, kan lawm hle a ni,” a ti bawk.

Transport Minister chuan tunhma lama mipui ten Transport Department an hmel hriatna chu MST Bus a nih thu sawiin, tunah chuan ram tana an pawimawhna hrang hrang pawh hriat chhoh a ni ve ta tih a sawi a, ram economy hi Transport Sector-ah a innghat thuk em em tih sawiin, chuvang chuan sawrkar pawhin nasa taka thuamtha zelin hmalakna engemawzat an kalpui mek tih a sawi a. Serchhip DTO Office-a thawk te pawh mipui ten an sawi thin an nih avanga an inhawn a tul thu sawiin, Traffic Police te leh lirthei neitute khalhtute zawng zawng nen thawkho vek an ni tih a sawi bawk.

Nikum (2022) chhung khan Mizoram-ah lirthei chetsualna thleng tum 120 ah mi 117 thiin mi 57 in hliam na an tawrh thu leh mi 53 in hliam tenau an tawrh thu Minister chuan sawi bawkin, heng lirthei chetsual chhan tam ber hi lirthei khalh chak vang leh fimkhur tawk loh vang a nih thu a sawi a, hei vang hian lirthei neitute leh khalhtu ten Dan zawm kan ngaih a tul thu leh Transport Department a thawktute pawhin thahnem an ngaih a tul thu a sawi a. Kan ramah Social Media velah sawisel thiam kan tamin siamthatu leh tihdan dik kawhhmuh theitu erawh kan tlem hle nia a hriat thu sawiin, mi tinten thil tha leh tangkai ngaihvena, ngaihhlut tur dik kan ngaihhlut thiam zel a tul nia a hriat thu a sawi bawk.

Serchhip DTO Office hawnna hun hi Principal Secretary, Transport K.T Beicho chuan kaihruaiin Transport Department Director Er. R. Lalrammawia chuan he Building sakna kawnga hma an lakna te a sawilang bawk a ni.

Serchhip Darnam Tlang-a District Transport Officer (DTO) Office building thar hi cheng nuai 240 senga sak niin kum 2020 November thla khan CB Construction chuan a sak hna hi an thawk a. Thla 12 chhunga sak zawh tura ruahman ni mah se harsatna hrang hrang avangin huntiam chhung hian sak zawh hman a ni ta lo a, nikum November thla khan sak zawh niin hawn a nih hma hian luahluh nghal a ni.

He building hi Mizopa chhiara chhawng li (4) niin a chhawng hnuai ber hi Chokidar quarters tura ruahman a ni a, a chhawng 2-na, kawng an hnuai hi Maxi Cab Terminal niin Maxi Cab 16 din theihna tur ruahman a ni a, kawngpui an chu Motor Vehicles Inspector (MVI) Room leh Fee pekna tur hmun atana ruahman niin a chhawng chung berah DTO Room leh thawktu dangte Room siam a ni bawk.