Volleyball Tournament hawnna hun hman a ni
Niminpiah atanga New Serchhip Volleyball Court-a khelh he Tournament hi Serchhip Bial-a INC Candidate tur R. Vanlaltluanga chuan hawngin hetiang District huap Tournament tha tak buatsaih thei Volleyball Association hruaitu Serchhip District in a nei chu lawmawm a tih thu a sawi a. Thalaite chu an hmalam hunah hmabak eng tak la nei turte an ni tih sawiin, chu hmabak hlen tur erawh chuan harsatna tam tak an la tawk thei a ni tih hriaa inchherhriam zel turin a chah a, mi hlawhtling kan tih te chu rinawmna nena harsatna paltlang tura bei hram hram thin te an ni tih pawh sawiin, mi rinawm leh taima taka bei thinte tan Pathian in malsawmna a pek thin thu leh chu malsawmna tawng tur chuan theihtawp chhuah turin a chah bawk a ni.
He Tournament hawnna hun hi SDVA Joint Secretary Ramthianghlima Ralte chuan kaihruaiin SDVA General Secretary C. Laldin-puia chuan Technical Report a pe a. Tun tuma Tournament-ah hian mipa tan kum 17 hnuailam inelna buatsaih niin Team 14 an tel a, hmeichhe tan kum 19 hnuailam inelna neih ni bawkin Team 8 an tel bawk a ni.
Nimin-a he Tournament hawnna hunah hian MVA Inter-District Volleyball Tournament 2023 khelh zawh taka pahnihna dinhmun luahtu Serchhip DVA Team te hnenah khuallian hian Certificate a hlan nghal a. Kumin a MVA Inter-District Volleyball Tournament-ah hian Serchhip District hian a thlengtu Champhai District chu Final-ah hneh lovin pahnihna dinhmun an luah a ni.
Comments
Post a Comment