Biate leh Bungzung inkar kawng laih thar hawng
He kawngpui laih thar hawnna hunah hian Home Minister chuan a bial chhung Biate khaw mipuite ngaih pawimawh leh nghahhlelh em em, Biate atanga Bungzung panna kawng laih tlanga hawn fel a ni ta chu lawmawm a tih thu sawiin, Biate atanga Bungzung panna kawng hawn tak chu Biate leh Bungzung mai bakah Champhai lam thleng pawha inkalpawhna tangkai tak a nih zel a beisei thu a sawi a. Tangkai taka mipuiten an chhawr theih ngei nan duhsakna a hlan a ni.
Biate to Bungzung kawng hi Tuipui lui kaltlanga laih niin km 22-a thui a ni a, Biate atanga Tuipui thleng hi km 11 vela thui niin km 5 thleng laihsa a awm a, MLA Fund cheng nuai 24.1 hmangin km 6 laih leh a ni a. Bungzung lam atangin East Tuipui Bialtu MLA leh Bamboo Link Road Board Vice Chairman H. Ramthanmawia chuan MLA Fund a pek bakah ni za inhlawhna hmangin Tuipui thleng hi laih a ni bawk.
Home Minister hian nimin chawhnu lam khan Biate-ah hian MNF Party zawm thar mi 77 chu a lawmlut a, Mi chak leh mi fing chuan harsatna te inhmuhchhuaha, insiamthat nan an hmang thin tih sawiin, chutiang tur chuan MNF party chuan ke a pen mek tih a sawi a, insiamtha tura hun an la neih thu leh an dinhmun hrechiang lova inthlan an hmachhawn a hlauhawm thu a sawi bawk.
Nizan khan Home Minister hi Biate-ah riakin tukin hian Biate in kumin a YMA General Conference a dawn tur atana Organising Committee te nen khawmpui neihna tur hmunhma te an en anga. Hemi hnu hian East Lungdar, Mualcheng, Chekawn leh Khawlailung te a tlawh leh ang.
Comments
Post a Comment