Agricutlure Minister in National Webinar a hmanpui

Agriculture Minister C. Lalrinsanga chuan nimin khan Aijal Club-a ‘National Webinar on Awareness and Use of Information and Communication Technology among the Farmers of Mizoram’ neih chu a hmanpui.

Mizoram sawrkar Agriculture Department, Krishi Vigyan Kendra (KVK) Lawngtlai leh Siaha District leh ICAR-NCIPM, New Delhi tangkawpa buatsaih he hunah hian Agriculture Minister chuan ICT kaltlanga loneitute chawikanna programme-a a tel chu lawmawm a tih thu leh ICT hmanraw chi hrang hrang chu Mizoram-a loneituten an hmang chho zel tih sawiin, hei hi loneitu tam takin an hmang tangkai tan hle a, lo neihdan kalphung pawh zawi zawiin a siam tha chho zel a ni, a ti a. ICT Technology kan neihsa te chu tih changtlun chhoh a, loneitu tam zawk te thleng phak a hmalak a ngaih thu pawh sawiin, Mizo tawng chu ICT hmanraw hrang hrang ah telh chhoh zel nise loneitu ten an tangkaipui zawk zia tur thu a sawi a. Mizoram in KVK kan mamawh belh thu pawh sawiin, Visit Agriculture Mission hnuaia hmalakna kalchho turah pawh ICT chuan hmun pawimawh tak a luah a beisei thu a sawi bawk.

He hunah hian ICAR-NCIPM, New Delhi-a Director Subash Chander pawhin loneituten Chemical fertilisers leh pesticides a chuangliam a an hman thin chuan nghawng thalo tak a nei tih sawiin, Biofertilisers leh Biopesticides hmang tam tura hmalak a pawimawh thu leh hemi atan hian ICT chu a tangkai hle dawn tih a sawi a. ICAR-NCIPM-a Scientist Dr. Meenakshi Malik pawhin loneitute hnena ICT hman tangkai dan zirtir chu a pawimawh thu leh Loneitu tamzawk te huapzo anih theih na tura theih ang anga hmalak a ngaih thu a sawi bawk.