Bialtu MLA hovin Chhiahtlang Hmar Veng Branch YMA kum 25 tlin lawmna neih a ni

Chhiahtlang Hmar Veng Branch YMA chuan nimin khan an din champha kum 25-na, Silver Jubilee lawmin he hun hi bialtu MLA leh SocialWelfare Minister Er. Lalrinawma chuan khuallian niin a hmanpui a ni.
Chhiahtlang Hmar Veng Branch YMA Zokhua-a an Branch YMA kum 25 tlin lawmna ah hian Er. Lalrinawma chuan Silver Jubilee hriatrengna lungphun hawngin Souvenir an buatsaih a tlangzarh a. Kristianna nena kalkawp tura min din sak pawl thianghlim YMA Chhiahtlang Hmar Veng Branch-in Silver Jubilee hial a lawm thei chu lawmawm a tih thu sawiin, Jubilee hi inremna leh hmasawnna thlentu ni se a duh thu a sawi a. “YMA chu a dinchhan ang ngeiin Kristian nundan tha ngaisangtu, lusun khawhar hnemtu, mi chhumchhia leh tanpui ngaite tanpuitu ni zel rawh se,” a ti bawk.


Bialtu MLA chuan YMA member te chu Zo nun zemawi tlawmngaihna, Aia upa te zahna kawngah leh faina kawngah midangte tihhmuhtu ni zel tura fuihin, YMA in a ngaih pawimawh thin ram leh hnam humhalh te, ruihhlo do te, zirna uar te chu sawrkar pawhin a ngaih pawimawh thu leh nasa takin kawng hrang hrangah hma a lak reng thu a sawi a. Sawrkarin hmasawnna atana hma a lakna tinrengah tlawmngai pawl leh khawtlang mipuiten an thawhpui thinna ah lawmthu a sawi a. Tuikum Bial enkawlna kawngah theihtawp a tawiawm a, tawngtai sak zel turin mipuite a sawm bawk.

Chhiahtlang Hmar Veng Branch YMA kum 25 tlin lawmna hun hi an Branch YMA Vice President Hmangaihchhunga chuan kaihruaiin Branch YMA President Lalneihkima Varte chuan inlawmna thu a sawi a, Branch YMA Secretary Eric Lalbiakdika chuan Report a pek bakah Serchhip Sub-Hqrs. YMA Secretary PC. Vanlalluna, KRAM Infracon Pvt. Ltd. aiawhin Chief of Project  Amit Goel leh Chhiahtlang North VCP C. Lalrawna te pawhin thu an sawi bawk a ni.

Chhiahtlang Hmar Veng Branch YMA hi Lamchhip YMA atanga indang niin kumin (2023) hi an din kum 25-na champha a ni a. Tun dinhmunah YMA member mipa 180 leh hmeichhia 129, an vaiin 309 an awm mek a. Nimin-a Silver Jubilee lawmna hunah hian kum 1998 atanga an Branch hruaitu hna lo chelh tawh te hnenah ngaihhruaina thuziak hlanin chawhnu lamah zaithiam te nen hun an hmang zui a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar