Aizawl-a AR chhuahsan tur-a ram nei mi 61 zinga mi 10-in an ram neihna lehkha an hlan let tawh

Aizawl-a Assam Rifles Battalion hmunpui chhuahsan tur ram-ah mimal ram nei mi 61 zinga 10-in an ram neihna lehkha an hlan let tawh a. Ram neitua inchhal mi 15-te chuan an ram neihte chu Assam Rifles ram luah chhung ami a ni lo niin an sawi thung.

Land Revenue and Settlement Director K. Laldingliana hnen atanga thudawn danin tunhnai khan Assam Rifles Battalion luah mek ram chhunga ram nei 2-te chuan an ram neihna lehkha sawrkarah an hlanlet leh a, hemi hmalam hian mi 8-in an lo pelet tawh a. An LSC leh House pass lo pelut tawh mi 8-te hi Lalnunmawii (Baktawng), Lalzarliana (Bawngkawn South), Thanpari (Khatla), Dr. Sangzuala (Zarkawt), Rochhunga Ralte (Electric Veng), Lalhuthanga (Dawrpui Vengthar), K. Sangnghaki (Bethlehem) leh V. Thlanga (Bethlehem) te an ni. LR&S Director chuan Assam Rifles Battalion luah lai ram chhunga LSC leh House Pass lo neite hi an LSC leh House Pass cancel sak a nih lohna chhan sawifiah turin lehkha pek an nih thu leh insawifiah hi an la tam lo nia sawiin, Chawlhkar hnih vel insawifiahna hun a la awm thu a sawi a. Assam Rifles luah chhunga ram lo neite hnena insawifiah tura a tihna-ah hian sipai luah chin ram chhungah Mizo District Land Revenue Act, 1956 Section 8-na tlawhchhanin mimal in ram neih theih a ni lova, Mizoram (Restriction on Use of Transferred Land) Act, 2002 hmangin ram neih chu a khap tih a tarlang a ni.

Aizawl-a Assam Rifles ram luah chhung hmun hrang hrangah mi hrang hrangin ram an nei a, chhinchhiahna atanga a lan danin Lammual ramah mi 54-in LSC leh House Pass an nei a. Assam Rifles Commandant Bangla ram chhungah mi pali leh McDonald Hill-a Assam Rifles ramah mi pathumin an nei bawk a, a vaiin LSC leh House pass 61 a ni. Mi 10-in an LSC leh Pass-te an pekkir hnu hian Assam Rifles luah ram, hmun thumah mi 51-in LSC leh Pass an la nei mek a ni.

Assam Rifles luah chhungah hian Mizo District Council hunlai khan mi 3 hnenah House pass pek a ni a. UT hun laiin Pass tam ber hi pek a ni a, chu chu Congress leh Mizo Union merger sawrkar, PC sawrkar leh Congress sawrkar a ni a. PC sawrkar chhung khan pass hi 2 pek a ni a, a dang zawng chu Congress hunlai a pek a ni. State nih hnu-ah MNF sawrkar laiin mi 2 pek an ni a. President’s Rule laiin 3 pek leh niin Congress a lo sawrkar leh khan pek a awm leh nual a. MNF sawrkar leh kum 2005 leh 2006 chhung khan PHE leh VC pahnih hnenah pek a awm leh bawk a ni. 

Hetihlai hian ‘Land Owner Association Near Assam Rifles’ ti-a hming invuah te chuan ram neitua inchhal mi 15-te chuan Assam Rifles lammual thlang, Bethlehem leh Tuithiang Veng chunga an ram neihte chu Assam Rifles ram luah chhung ami a ni lo niin an sawi ve thung a. District Council hunlai a House Pass te hi pek an nih thu sawiin, UT sawrkarin LSC a siamsak te an ni tih an sawi a. An ram hi Assam Gazette 1952-a Assam Rifles ram chin sawifiahna pawn ami an nih thu leh an pawm dan an sawi a. An LSC-te peklet an tum loh thu an sawi bawk.

Tarlan tawh thin angin March ni 8, 2019-a Council of Minister thutkhawm chuan sipai luah ram-a dan lova LSC leh Pass pekte chu thiah a lo rel tawh a. Central YMA pawhin sipai chhuahsan tur ram mimal kuta a luh chu rem ti lovin LSC leh Pass neitute chu sawrkar ah pekir turin an lo ngen tawh thin a; hemi chungchangah hian kum 2020 khan Gauhati High Court-ah Public Interest Litigation (PIL) an lo thehlut tawh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar