Union Home Minister hnenah lo thlen

Aizawl-a rawn kal Union Home Minister Amit Shah chu Raj Bhavan-ah tlawmngai pawl hrang hrang ten lo kawmin an mamawh leh harsatna bakah Mizoram mamawhhh te an lo thlen.

Union Home Minister hi NGO Co-Ordination Committee hruaitute chuan Raj Bhavan-ah lo kawmin kum 2018-a Union Home Minister-in Mizoram a rawn tlawh tuma ramri veng tura Mizo BSF Battalion din tura a lo intiam tawh chu a hlawhtlinnna hmuh an in beisei thu leh bawhzui thuai a nih ngei theih nana hma la turin an ngen a. Assam Rifles-te Aizawl atanga sawnchhuah an nih tur thu-ah NGO Co-Ordination Committee chuan lawmthu sawiin, Assam Rifles te a rang thei bera sawnchhuah an duh thu an lo thlen a, Union Home Minister chuan thla hnih/thum chhunga Sawrkar nena inremna anga an chhuah tur thu a sawi a. Hei bakah hian Mizoram thenawm Myanmar leh Bangladesh atanga kan unau raltlante chungchang pawh NGO Co-Ordination Committee hruaitute hian sawi langin, a theih ang anga tanpui turin an ngen bawk.

Mizoram State Level Cooperative Societies Coordination Committee leh Muanna Veng Farming Cooperative Society Ltd. ten Home Minister hnenah hian an mamawh lo thlenin, hemi hnu hian Lai, Mara  leh Chakma hruaitute nen an inkawm bawk a. Union Home Minister hnenah hian Mizoram Underground Returnees Association (MURA), Cricket Association of Mizoram (CAM), Aizawl Mosque Committee leh Champhai District Import Export & Transport Union te chuan ziakin an mamawh te an lo thlen bawk a ni.