Huaisen leh hnathawk tha lawmman dawng

India ram-a mahni hnathawhnaa inpe, huaisen leh hnathawk tha lawmman chu nimin khan Lunglei Fire Station chuan an dawng.

Nimin khan New Delhi-a Vigyan Bhawan-ah Prime Minister Narendra Modi chuan '3rd Session of National Platform for Disaster Risk Reduction' (NPDRR-2023) hawngin he hunah hian India rama mahni hnathawhnaa inpe, huaisen leh hnathawktha lawmman 'Subhash Chandra Bose Appda Prabhandan Puraskar Awards 2023' semna neih nghal a ni a. He lawmman dawngtute zingah Lunglei Fire Station, Mizoram pawh telin Fire & Emergency Services-a Director C. Lalzahngoa leh SP Fire & Emergency Services Francis Lalnuntluanga Ralte te chuan Prime Minister hnen atangin an dawng a, Certificate leh pawisafai cheng nuai 51 a keng tel a ni. He hunah hian kum 2021-a Lunglei ram kang chungchang Video tawi tihlan niin Video siam tur hian February 2023 khan Delhi atangin Official te an lo kal a ni.

He lawmman 'Subhash Chandra Bose Appda Prabhandan Puraskar Awards 2023' dawng thei tura Nomination 274 lut atangin Odissa Disaster Management Authority leh Lunglei Fire Station te thlanchhuah an ni.