Vawiin atanga Mizoram-a sawrkar hnathawk ten lungawiloh lantir an tum chu thulh rih a ni

Federation of Mizoram Government Employees & Workers (FMGE&W) ten Vawiin atanga lungawiloh lantir an tum chu sawrkar hotute nen inbiakna an neih hnuah an thulh a. Sawrkar in Dearness Allowance (DA) pung pek a tiam nia thudawn a ni.

Mizoram-a sawrkar hnathawk inzawmkhawm pawl, FMGE&W te hian sawrkar-a an thilphut hrng hrang nawrna atan Vawiin atang hian lungawi loh lantir an tum a. Hemi chungchangah hian Inrinni chawhma lam khan Chief Minister Office-ah Chief Minister hovin sawrkar hotute nen inkawmna neiin an thilphut zingah sawrkar chuan DA rate chu 1.4.2023 atanga 3% a tipungin 31% a ni anga, July thla a sawiho leh tura rawt a ni a. Hei bakah hian sawrkar hnathawk te hlawh a hun tak (thla tir-ah) pek zel tumin theihtawp in sawrkar in tan a la zel ang tih leh 62 years Retiring Age chungchang ah Chief Minister-in Cabinet Minister-te a thuphungin a sawipui tawh thu leh hun remchang hmasa berah DP&AR bultumin Finance Department te, Zirlai Pawl te leh NGO hrang hrangte nen inrawnkhawmna siam chu Chief Minister chuan a rawt bawk a ni.

Hetianga an thil phut chungchanga sawrkar rawtna ngaihtuah hian Inrinni tlai dar 3:00 khan FMGE&W chuan Executive Committee thutkhawm hmanhmawh nei nghalin Hlawh a hun taka pe zel tura sawrkar hotuten theihtawpa tanlak zel an tum chu lawmawm an tih thu leh 62 yrs Retiring Age chungchanga Chief Minister-in inrawnkhawmna neih a rawt pawh tha tiin an pawm thu an sawi a. DA punna chungchanga rawtna erawh chu an beisei a phak loh avangin leh, Central rate kan phak lohna a tam tawh avangin an Member ten an pawm thei dawn lo nia hriain Chief Minister hnenah thleh leh nise an ti a. Inrinni zan vek khan Chief Minister hi hmuh leh niin sawrkar hnathawk ten ngenngawl taka an ngen avangin Finance hotute leh a Cabinet hote pawh rawn loin, DA pung 1%, a hmaa mi nen 4% (wef 1.4.2023) chu pek a remtih sak ta a ni.

FMGE&W hian thutkhawm nei lehin, “Sum harsa tak chunga sawrkarin hlawh a hun taka min pe tura theihtawp chhuaha tanlak zel a tum hi lawmawm kan ti. DA pung 4% wef 1.4.2023 min phalsak pawh hi kan duhthusam ni lo mah se, sawrkarin theihtawp a chhuah takzet niin kan ngai,” tiin July 2023-a hemi chungchang sawiho leh hun atan beiseina sang tak nei chungin peaceful demonstration neih an tum chu an thulh tih an sawi a ni.