Slab chim a dona Mau ngheh loh vang tih sawi

Lengpui Airport tihchangtlun hna thawh lai, Baggage Make-Up Area (BMA) tur building sak mek Slab chim chhan chu a dona Mau thenkhat ngheh tawk loh vang a ni.

Assembly Budget Session neih zawh taka ZPM Member Lalduhoma zawhna PWD changtu, Chief Minister-in ziaka a chhan danin Lengpui Airport-a BMA tur building sak mek chu Slab chhun laiin a chim a, a chim hun chu 10.3.2022 tlai dar 4:50 niin, Contractor Kamlova Chhangte (K.R. Construction), Thuampui, Aizawl a ni a. Action lak dan tlangpui Chief Minister-in a tarlan danin Slab chim chu a hmunah enfiah nghal niin, an hnathawh leh Material quality-te endik nawn leh a ni a, Design Drawing anga hna hi thawh niin Material quality that loh vang emaw, Concrete proportion dik loh vang emaw a chim nia ngaih a ni lova, a chim chhan ber nia ngaih chu Slab dona Mau thenkhat an nghet tawk lova, concrete chhun laia vibrator hmanga hawlh muk a nihin lo pelhsawlhin a chunga concrete chhun lai mek rit takin a delh chim a ni.

Slab leh Beam te a ruala chhun an ni a, hmun khat laia chimin a sir vela concrete, khami nia chhun zawh tawh, la char si lo ho pawh a pawt chim tel a. Slab chim hi hnathawh lai meka thil thleng a ni a, construction accident anga ngaih niin, Contract Agreement angin Contractor mawhphurhna a ni a; chuvangin, Contractor chu ama sum senga sa tha leh vek turin hriattir nghal a ni a. Chutiang chuan, Contractor-in ama sum sengin a sa tha leh vek tawh a, hemi sak that leh vang hian sawrkarin sum sen belh a nei lo a ni.