Oil Palm in sik leh sa leh ram leilung-ah a chhe zawnga nghawng a neih zirchianna kalpui mek

Oil Palm avanga sik leh sa leh ram leilung hausakna a chhe zawng a nghawng awm thei awm a sawi thin te zirchiang turin Mizoram-ah Pilot Research Studies kalpui mek a ni.

He thu hi Mizoram Oil Palm Inkhawmpui vawi khatna nimin-a Kolasib Diakkawn YMA Hall-a neih a hmanpuina ah J. Hmingthanmawia IAS, Secretary, Agriculture Department chuan sawiin, Mizoram-a Pilot Research Studies kalpui mek hnuaiah hian Agriculture department leh a kaihhnawih Department chhunga mithiam thlanchhuah te an awm thu a sawi a. Mihring nitin khawsak phung a Tel (Edible Oil) mamawhna sang zel avanga India ram pawn atanga Tel tam tham tak chahluh thin chhawk zangkhai nan National Mission on Edible Oil - Oil Palm (NMEO-OP) hnuaiah sawrkar laipui chuan India ramchhung ngeia Oil Palm rah thahnem zawk tharchhuah a nih theih nan hma a lak mek thu a sawi a. Mizoram hmar lama Oil Plam chingtute Oil Plam rah lei turin Godrej Agrovet Ltd. an awm bakah chhim lam a Oil Plam rah lei turin Patanjali Foods Ltd.-te changtlung zawk a inbun turin ruahmanna kalpui mek a nih thu a sawi a, Oil Plam rah hralhna man te pawh ennawn zel a nih avangin kuthnathawktute tan innghahna tlak leh rintlak a nih thu a sawi.

He hunah hian Godrej Agrovet Ltd. a Senior Executive Lalruatkima chuan kum 2022-23 chhungin Palm Oil Mill, Bukvannei-ah Oil Palm rah cheng nuai 600 man hu lei a nih thu leh hemi kaihhnawih ah hian thalai thahnem tak tan inhlawhna siam sak a nih thu a sawi a. Oil Plam chingtute harsatna sutkianpui tur leh an mamawh ang leitha an lei theih nan te, Oil Plam rah hralh tura Bukvannei Palm Oil Mill pan thei lo te tan Samadhan-One Stop Solution Centre chu Mamit District chhunga bun turin hmalak mek a nih thu te a sawi bawk.

Oil Palm hi Kolasib District-ah kum 2005-2006 atanga chin tan niin District ram zau zawng (1,38,251 ha.) atanga chhutin Oil Palm chin theihna (Potential Area) awm zat hi 14,141 hactare anga chhut a ni a. Partner company- Godrej Agrovet Ltd. ten October ni 28, 2014-ah Oil Palm Mill, Bukvannei-ah dinin Kolasib District chhungah chhungkaw 278-in Oil Palm an ching mek a, mumal taka a rah hralh thei hi chhungkaw 182 an awm mek bawk. Oil Palm chingtuten kum 2022-2023 chhungin Oil Plam rah 1,870 Metric ton chu Company-te hnenah hralhchhuak tawh anga chhinchhiah a ni a. Scheme thar- National Mission On Edible Oils-Oil Palm (NMEO-OP) kalpui tan a nih hnu (2022-2023) hian loneitute hnenah kawng hrang hrangin tanpuina pek thin a ni bawk.