Naktuk atangin B20 Meeting

Naktuk atang hian Aizawl-ah G20 intawhkhawmna chikhat, B20 Meeting chu neih a ni dawn.

Tunkar Zirtawpni thleng awh tur B20 Meeting neih tur chungchangah hian nimin khan Chief Minister Zoramthanga chuan Chief Minister Office Conference Hall-ah thuthar thehdarhtute kawmna neiin India ramin G20 Presidency a neih lai taka Mizoram in B-20 Session a thleng tur chu lawmawm a tih thu a sawi a. B-20 Conference Mizoram-in a thlen turah Infrastructure Development chungchangte, Skill Development lamte, Resource lamah Bamboo lam te, kan Culture te, Handloom leh Mizoram in kan thilsiamte ngaihpawimawh tum a nih thu a sawi a, North East chu India ramah Infrastructure-ah kan hnufual thu leh Development-ah kan harsat thu sawiin, G-20 Sawrkar hmaah kan thawhho theih tur awmte, investment tihna remchang turte, khawvel ram dang sawrkarin kawng hrang hranga min buaipui theih tur investment lamte en tur a nih thu a sawi bawk. 

Thuthar thehdartute kawmna hunah hian Chief Minister chuan ram hrang hrang 17 atanga Palai (overseas delegates) an beisei thu te, Overseas sumdawnna kaihhnawih Palai (Overseas Business Delegates) bikah hian member 48 vel rawn kal tura beisei a nih thu leh Diplomats 17 vel rawn kal tura beisei a nih thu a sawi a. B20 Meeting-ah hian Opportunities for Multilateral Business Partnerships in Urban Planning, Infrastructure, Bamboo, Startups, Skill Development, Handloom & Handicraft, Nursing and Paramedics te chu an an ngaih-pawimawh turte a nih thu Chief Minister chuan sawiin, hetiang hun thleng thei tura duhsakna Mizoram-in a chang thei chu India Sawrkar laipui hnenah lawmthu a sawi bawk.