DC&MA Minister in mipui te hnenah ngaihdam a dil

District Council & Minority Affairs (DC& MA) changtu Minister R. Lalzirliana chuan Assembly House-a a thusawi-ah chhim lam unaute rilru a tina tih sawiin, ngaihdam a dil a. DC&MA chu midang chak tha zawkin chang thei se a duh tih sawiin, “Dilna pawh ka thehlut nghal nise a tha ang,” a ti.

Nimin-a Assembly Budget Session zawhna leh chhanna tawp hnu-ah dan anga Speaker hnena phalna a dil angin, DC&MA changtu Minister R. Lalzirliana chuan Statement a pe a, DC&MA an sawi lai a tawng-kam inkawkalh deuh awmah a tawngkam hman chu a ennawn lehin a duhzawng a ni bik lo tih a tarlang a, “He ka tawngkam hian mimal pakhat rilru a tihnat pawh hrehawm ka ti a, chhim lam a kan unau te rilru ka lo tina a ni tih ka hria a, ngaihdam ka dil a ni,” a ti.

Autonomous District Council (ADC) pathum te chu sawrkar hmasa lamah pawh Pathian leh hotute duhsakna in kum 10 chhung deuhthaw a kutah a lo awm tawh tih tarlang bawkin, “Sawrkar tawp dawn lamah CM hnenah kei hi chuan ka tlinlo a ni, min chhawk teh ka ti a, hrethiam takin min chhawk a, kan hun a tawp a...” tiin, sawrkar thar lo dingah a kutah bawk a awm leh tih a sawi a. Chumi chungchang ah chuan a tirah leh a hnulamah pawh CM hnenah kum chawhnu lam a nih ve tawh vangte, hriselna dinhmun vangte in chak vak zawkte laktir a, amah thlak turin a lo dil tawh thin niin a sawi bawk.

R. Lalzirliana chuan, “ADC changtu ka ni a, he Department enkawl tur hi chuan politics hlang deuhthaw a ngai a, ADC mipuiten chak zawkte an duh angin, pek theih a nih chuan ka lawm ngawt ang a, dilna te pawh ka thehlut nghal nise a tha in ka ring,” a ti a ni.