MZP ten nimin khan 'Zoram Ni' an hmang

March 5, 1966-a Bomb hmanga Mizoram beih a nih hrietrengna atana MZP ten 'Zoram Ni' hman thin chu nimin khan Aizawl-ah hman leh niin Rajya Sabha MP K. Vanlalvena chuan khuallian niin a hmanpui a ni.

Vaivakawn Cultural Centre Cum Auditorium-a 'Zoram Ni' hmanna ah hian Rajya Sabha MP chuan Zoram Ni tia sawi thin chu a nawlpuia hnam tana kan lo tawrhna nasat ber ni a nih thu leh Jet Fighter hmanga India sawrkarin min beih chiamna ni anih thu sawiin, “Vawiin a hetiang hun kan hmang hi India sawrkar lakah inlak hran tum leh na ni lo in, khatih hun laia Mizo mipui tawrhna kan hre reng a, chu chuan ram leh hnam hmangaihna ah harh thar leh na hun atan hmang ila,” tiin, he hun a kal te pawh kan ram leh hnam pasaltha te hrereng tur leh thangthar te pawn thahnem ngai taka an thiltihna ah hnam rilru pu chungin tih zel a duh thu a sawi a. Tunhnaiah mi thenkhat ten Zalenna an sual lo tih a awm thin chu thil hriat fuh tawk loh vang anih thu a sawi bawk.

He hun hi MZP General Hqrs. Vice President Andrew F. Lalram-nghaka chuan kaihruaiin MZP President Lalnunmawia Pautu chuan ram leh hnam in hun harsa a tawh hi theinghilh mai chi a ni lo tih sawiin, “Phuba lak tumna leh thinrim tharna tur a ni lova, Hnam anga tanrualna leh inpumkhatna ni atan i hmang ang u,” a ti bawk. 'Zoram Ni' hi March 5-ah hman thin ni mah se kumin hian Pathianni a nih avangin March 6-ah hman a ni ta zawk a ni.