Mizo Hmeichhia in Water Warrior Award dawng

Lunglei District chhung Sairep khuaa VCP HS. Lalawmpuii chuan Inrinni khan India President hnen atangin ‘Water Warrior Award’ a dawng a, he chawimawina hi rampum-a mi 6 te hnenah hlan a ni.

Inrinni khan Sawrkar kaipui-a Department of Drinking Water DDWS, Ministry of Jal Shakti buatsaihin Vigyan Bhawan, New Delhi-ah Swachh Sujal Shakti Samman neih niin he hunah hian India ram-a hmeichhia te zinga Faina, Tuihna humhalh leh Water Supply System enkawlnaa thawk tha te chawimawina hun hman niin Water Warrior Award chu mi paruk (6) hnenah hlan a ni a. Mizoram atanga chawimawina dawngtu HS. Lalawmpuii hi PHE Department Official pahnih leh District danga Tui leh Faina kawnga thawk tha hmeichhia pali ten an tawiawm a ni.

HS. Lalawmpuii hian tuihna humhalh kawnga a thawh hlawk avang te, ruahtui khawl that kawnga an khaw tana a thawh hlawk avang te leh lui leh tuihna dang hmunhma vawnfai kawnga hma a lak that avangte in he chawimawina hi a dawng a, Award dawng tur hian PHE Department leh NEIDA chuan an buaipui a ni.