Mahni duty pui kaphlumtu Police atangin ban a ni

Nizan hmasa khan 2nd Bn. MAP-a thawk Hav. Bimal Kanti Chakma chuan Assam ramri, Buarchep-a a duty pui mi pahnih a kaphlum a, Bimal Kanti Chakma hi a hna atanga ban niin a kahhlum tak chhungte chu sawrkar in Compassionate Appointment a pe dawn.

He thil thleng chungchangah hian nimin khan IGP (Hqrs.) John Neihlaia chuan Aizawl-a DGP Conference Hall-ah thuthar thehdarhtute kawmin Assam ramri Buarchep-a Police hmunpui atanga hla vak lo ah nizan hmasa khan Bimal Kanti Chakma leh Havildar dang pahnih J. Lalrohlua (50), Lawngtlai leh Indra Kumar Rai (51), Lunglei te Duty in, Silai ri an hriata Post Commander leh midangte an duty-na hmun an thlen chuan J. Lalrohlua hi Camp-ah thiin an hmu a, Indra Kumar Rai chu Camp atanga ft. 40 velah hliam tuara hmuh ni thungin an bula awm Bimal Kanti hi man nghal a ni a. He thil thlenna hmunah hian Silai mu ruak 15 hmuh niin, J. Lalrohlua hi a lu-ah kah a ni a, Indra Kumar hi a Awm (Chest)-ah kah a ni thung a, Vairengte CHC panpui a nih hnuah a hliam tuar lovin nizan hmasa dar 7:20 khan a boral zui a ni.

Hav. Indra Kumar Rai hi Hav. Z. Biakthara chuan thil thlen dan zawtin, Hav. Indra Kumar Rai chuan engmah inhnialna an neih loh thu leh Hav. Bimal Kanti Chakma hian silai in a rawn kap ringawt niin a sawi a. Pawikhawihtu nia hriat Hav. Bimal Kanti Chakma (56), Luangmual, Lunglei hi Police manin Vairengte PS-ah hruai nghal a ni a. A sawi dan chuan Hav. J. Lalrohlua leh Hav. Indra Kumar Rai te hian zu a ruih thin thu Post Commander hnenah an report thin a, pawikhawihna thlen hma tlai hian anni pahnih hnenah hian eng vanga Post Commander hnenah report thin nge an nih a zawt a, thinrim in a kap ta mai niin a sawi a. Court-ah hruai a nih hnuah nimin khan Kolasib District Jail-ah dahluh nghal a ni.

IGP chuan Bimal Kanti Chakma chu Police-a awm reng tlaka an ngaih loh avangin inquiry ti loa ban nghal a nih thu sawiin, “Dan in thuneihna min pek tho hmangin kan ban nghal a ni,” a ti a. Hav. J. Lalrohlua leh Hav. Indra Kumar Rai te chu ral laka thi ni chiah lo mah se, ramri-a duty an nih avangin an chhungte hna pek an dilsak tih sawiin IGP chuan, hei hi sawrkar hotuten an phalsak thu a puang nghal a, an ruang te hi an khua Lunglei leh Lawngtlai-ah Helicopter hmanga lak a nih tur thu a sawi bawk.

IGP chuan he thil thleng hi mimal thil a nih thu sawiin, Communal thil a ni lo tih a sawi a, “Zurui pakhat in a thiante a kap a ni mai. Hnam leh hnam, chi leh chi ang zawnga thil lak loh tha kan ti,” a ti bawk.