Mission ICU in Champhai-ah bungrua an hlan

Mission ICU chuan nimin khan Champhai District Hospital tan cheng nuai 40 hu bungrua chi hrang hrang an hlan.

Champhai District Administration hmalakna kaltlanga heng bungrua inhlanna hun hi nimin khan Champhai-a Nursing School Building-ah neih niin bungrua an hlan te hi ICU khum 10 bakah Ventilator (2 Units), Bipap (2 Units), Monitor (5 Para), 2-function ICU cots (10 Units), Syringe pump (2 Units) leh Infusion Pump (2 Units) te a ni a. Mission ICU Co-Founder Maanoj Shah chuan COVID-19 hrileng avanga Health Facility tha dawng thei lo, nunna tam tak chan an awm leh harsatna awmte hre reng chunga hma la an nih thu sawiin, Khawpui leh thingtlang-a Health facility inthlauhna tizim tura tan an lak zel dawn thu a sawi a. Mission ICU-a CEO leh Co-Founder Dr. Edmond Fernandes pawhin Champhai-a ICU khum 10 hlan nen hian India ram-a thingtlang khaw hrang hrang 20-ah te ICU khum a vaiin 200 an hlan fel tak thu a sawi bawk.

Nimin-a heng bungrua inhlanna hun hi Health & Family Welfare Board Vice Chairman Dr. ZR. Thiamsanga MLA pawhin hmanpuiin Mission ICU te chungah lawmthu a sawi a. District Hospital Champhai-ah cheng vbc. 14.5 sengin Critical Care Block siam tum a nih thu leh sum pawh ruahman fel a nih thu a sawi a. Nursing School Hostel sak mek a nih thu leh a ranglama Nursing School kalpui a nih theih nan Sawrkarin hma a lak zel thu te, District Hospital Champhai-ah ICU leh Dialysis-te pawh thawktu indaihlohna karah kalpui mek zel niin Trauma Centre puitlin theih nana theihtawp chhuah ho a pawimawh thu te a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar