G20 hnuaia B20 Meeting Aizawl-ah neih niin ram hrang hrang 17 atangin Palaite an tel

Aizawl in G20 hnuaia Meeting pakhat, B20 Meeting a thlen chu nimin khan Mizoram University Auditorium-ah neih a ni a, he hun hi Union Minister of State for Commerce & Industries Som Parkash leh Union Minister of State for External Affairs Dr. RK. Ranjan Singh te chuan an rawn hmanpui a ni.

B20 Meeting hawnna inkhawm hi Confederation of Indian Industry (CII) Co-Chairman Pradeep Bagla chuan kaihruaiin kalkhawmte lawmna thu a sawi a, Mizoram Chief Minister Zoramthanga chuan India rama G20 Meeting hrang hrang neih tur zingah Mizoram leh hmarchhak State dangte a nghah a ni tel chu lawmawm a tih thu sawiin, Prime Ministe Narendra Modi chungah pawh lawmthu a sawi a. Mizoram chu investment tihna hmun tha tak a nihna he Meting hian a phochhuah ngei a beisei thu a sawi bawk. Chief Minister chuan Horticulture, Agriculture leh ramngaw behchhanin State economy hi thui tak a tihhmasawn theih dan te sawiin, he Conference in a bitum bik - Urban Planning, Infrastructure, Bamboo, Startups, Skill Development leh Nursing and Paramedics te chu Mizoram in theihna a neih thatna lai a nih thu a sawi a. Mizoram chu ramdang nen a inri a nih avanga insumdawn tawnna leh ram dangte nen inlaichinna kawnga pawimawhna a neih thu a sawi bawk.

External Affairs Minister Dr. RK. Ranjan Singh pawhin Mizoram chu literacy rate sang tak a nih mai bakah English tawng hmang thei thahnem tak an awm avangin leh, thalai lehkhathiam an tam avangin hengte hian business khawvelah tangkaina tam tak a siam theih thu a sawi a. India economy chu tun hun reilote ah khawvel huapin nasa taka a than thu leh a bik takin Multilateral Business Partnership siam chungchangah hmalak a nih dan te a sawi bawk.

Commerce & Industries Minister Som Parkash pawhin India chu khawvela Start up eco-system lian ber zing ami a nih thu leh hmarchhak State dangte ang bawkin Mizoram chu investment tihna hmun tha tak a nih thu a sawi a. Industry hrang hrangah hmarchhak State-te chu hmasawnna ruhrel hrang hrang din a tihchangtlun hna sawrkar laipui chuan a thawh thu te, a bik takin National Bamboo Mission kaltlanga Mau hmanga economy tihhmasawn hna thawh a nih dan te a sawi a. Healthcare lamah, a bik takin Nursing and Paramedics hmasawnna atan Mizoramin potential a neih thu te sawiin, hnam ziarang a bet nghet tlat handloom and handicraft ah te, service sector ah leh thil dang dangah Mizoram chu hmasawn theihna tam tak Mizoram a nei nia a hmuh thu a sawi bawk.

B20 Meeting-ah hian chawhnu lamah Plenary Session neih niin Urban Planning, Infrastructure, Bamboo, Startups, Skill Development, Handloom & Handicraft, Nursing & Paramedics atan Multilateral Business Partnership siam theihna tur remchang bitum in, Business to Business (B2B) leh Business to Government (B2G) Meeting te CII bultuma buat-saih a ni a. State pawn atanga lo kal Business Delegates te chuan tualchhunga thil siamchhuahna neitute nen inkawmna an nei bawk.

He Meeting-ah hian delegate te hmuh tura Stall siamin Mizorama industry te thilsiam phochhuah a ni a. B20 Meeting-ah hian ram 17 (Argentina, Bangladesh, Bhutan, Canada, Costa Rica, Ivory Coast, China, France, Germany, Ghana, Japan, Nepal, Russia, Sri Lanka, South Africa, United States leh Zimbabwe) atangin Palai an lo kal bakah Indian leh local business neitu an tel bawk a. Visiting dignitary te hi Overseas business delegate 48 leh diplomat 17 an ni.