Lunglei Municipal Council inthlan hmasa ber March 29, 2023 khian neih a ni dawn

Lunglei Municipal Council (LMC) Inthlanpui hmasa ber chu March 29, 2023 khian neih a ni dawn a, he inthlanna neih tur atana Hmeichhia te tana Seat hauh tur pawh nimin khan pawhfel a ni bawk.

Ram Danpui in thuneihna a pek dungzuia Section 346 (1) of the Mizoram Municipalities Act, 2007 as amended-in mawhphurhna a pek angin State Election Commission, Mizoram chuan Mizoram Sawrkar rawn chungin 1st General Election to Lunglei Municipal Council, 2023 chu March ni 29, 2023 (Nilaini) hian a buatsaih dawn a, he inthlanna hi LMC Ward 11-ah neih tura ruahman niin kum 5 chhung atana Councillor tur thlanchhuah an ni dawn a, inthlanna neih tur puan a nih rual hian Lunglei Municipality huamchhungah hian Model Code of Conducts hman nghal a ni bawk.

Nimin-a he inthlanna neih hun tur puanchhuah a nih rual hian hriattirna pawh tihchhuah nghal a ni a, inthlan chuh tumte tan March 10, 2023 tlai dar 3:00 thleng Nomination Paper thehluh theih a ni dawn a, heng hming pekluh te hi March 13, 2023-ah enfiahin a tuk March 14, 2023 tlai dar 3:00 thlengin inhnukdawk duhte tan hun hawn a ni anga, a tuk March 15-ah Candidate te chu an Symbol tur pechhuakin March 29, 2023 zing dar 7:00 atanga tlai dar 4:00 thlengin Vote thlak a ni anga, engemaw harsatna avanga Vote thlak that ngaihna ah te chuan March 30-ah Vote thlak tur niin he inthlanna a Vote tla te hi April 3, 2023-ah a ruala chhiar tur a ni ang. He inthlanna ah hian EVM hman tur a ni dawn a, Polling Station 44 a awm dawn a ni.

LMC inthlanna neih tur atan hian nimin khan State Election Commissioner Laima Chozah, IAS (Rtd) hovin Lunglei DC Conference Hall-ah LMC inthlanna hmasa ber neih tura Ram Danpui in Hmeichhia te tana ram leh tualchhung inrelbawlnaah Seat awm atanga za zela 33 (33%) a hauhsak (reserved) thlanna (draw of lots) neih a ni a. LMC-a Ward 11 atang hian Hmeichhia te tana hauh tur Seat 4 chu pawhfel niin Ward No. II (Serkawn, Zohnuai), Ward No. VIII (Ramthar, Farm Veng), Ward No. V (Sazaikawn, Hauruang, Rahsi Veng) leh Ward No. X (Sethlun, Luangmual, Theiriat, Hrangchalkawn) te an ni a, MHIP, YMA, MUP leh MJA aiawhten an pawt a ni. He hunah hian Mizoram State Election Commissioner Laima Chozah chuan LMC inthlan neih tur chu felfai taka kalpui anih theihnan kalkhawmte chu an hma zawna an tih tur theuh tha taka hlen chhuak tura chahin, Mizoram Municipalities Act, 2007 lo zirchianga an mawhphurna leh chanvo neih te bel taka lo hre theuh turin a chah bawk a ni.