Eiruk thubuai-a zawn mek Delhi-ah mann a ni

Cheng nuai 268 eiruk thubuai avanga zawn mek Mustagar Rahman, Guwahati a cheng chu Anti Corruption Bureau (ACB) mi te’n manin niminpiah khan Central Jail-ah dahluh a ni.

ACB Senior SP Lalsanglura sawi danin Mustagar Rahman hi tunhnai Delhi-ah man a ni a, tihfel ngaite tihfel a nih hnu-ah niminpiah khan Aizawl rawn thlenpui a ni a. Aizawl thlenpui a nih hnu hian a chungchang ngaihtuahtu Special Court (Prevention of Corruption) hma-ah hruai a ni a. Special Judge chuan a chungchang ngaih-tuah chhung Judicial Custody-a hren turin Central Jail-ah a thawn nghal a ni. Court lam atanga thudawn danin Mustagar Rahman-a’n thubuai a neihpui MAMCO Managing Director hlui Lalremthanga chu thiamloh chantir a lo nih tawh avangin ani chungchang ngaihtuah hun chhung hi a rei a rinawm loh a ni.

Lalremthanga leh Mustagar Rahman te hi MAMCO hnuaia contract thawktu a thlan ni a an sawi, Contractor-te hnen atanga pawisa tam tham tak bumna hmanga laksak ah puh an ni a. Hemi thubuai-ah hian Special Court chuan nikum December ni 22 khan Lalremthanga chu thiamloh chantirin, December ni 23 khan Court hian kum 5 tang tur leh cheng nuai 15 chawi turin a lo hrem tawh a. Pawisa hi a chawi loh chuan kum 5 dang a tan belh leh ang.

A thubuai chhuitu ACB-te chuan Lalrem-thanga hi cheng nuai 107 tichingpenah an puh a, Mustagar Rahman hi a account hmanga cheng nuai 161 chheprelh ah puh a ni bawk a. Amah man tura Court-in Warrant of Arrest a siam hmanga man tuma thla hnih zet zawn a nih hnuah tunhnai khan Delhi-ah man niin Mizoram-ah rawn lak a ni ta a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man