Chawlhkar khat awh International Women’s Day kharna SW&TA Minister hovin neih a ni

Tun thla ni 1 atanga ‘International Women's Day’ hman chu nimin khan Social Welfare & Tribal Affairs Minister Er. Lalrinawma hovin PHQ Multipurpose Hall, Khatla-ah a kharna neih a ni.

Kumtin March 8-a hman thin International Women's Day hi sawrkar laipui-a Ministry of Women & Child Development chuan kumin hian Hapta khat chhung hmang tura tiin Mizoram-ah pawh Directorate of Women & Child Development, Social Welfare & Tribal Affairs Department chuan tun thla ni 1 khan a hawnna an lo nei tawh a. Nimin-a a kharna neih ah hian SW&TA Minister Er. Lalrinawma chuan hmeichhiate ropui zia sawiin, khawvel pum huapin ‘Hmeichhiate ni’ neih hi an phu hliah hliah thu a sawi a, Pathian thilsiam ropui hmeichhiate pawimawhzia hi inzirtir leh inhrilhhriat fo a pawimawh thu a sawi bawk.

Minister chuan hmeichhe pawl hrang hrang leh tlawmngai pawlte inpekna leh thawhrimna chu fakawm a tih thu pawh sawiin, Mizoram-ah an dinhmun tha chho zelin mi tam tak chawikan ni tawh mahse tan lak a la ngaih nasat thu a sawi a. Hmeichhiate chawikang leh dawmkang tur chuan hmeichhia te kutah a innghat thui thu leh, chhungkua leh khawtlang ah hmeichhe zahna inzirtirna tam se, hmeichhe rahbehnate a kiam duak a rin thu a sawi a. Hmeichhe zalenna ram chu ram changkang a nih thu sawiin, chhungkua leh fanaute ah bultan chuan hmeichhiate zalenna chu chhungkaw tinin an hmuh ngei a rin thu a sawi bawk.

International Women's Day kharna hun nimin-a hman ah hian Mizo hmeichhia pahnih te hnenah chawimawina hlan niin heng chawimawina hlan te hi Padma Shree dawng tawh, rimawi khawvela mi hriat hlawh KC. Runremsangi leh hmeithai te leh chanhai zawkte lo pui thin tu, Hmeithai Association dintu ni bawk, Veronica Zatluangi te an ni.

Chawlhkar khat chhung International Women's Day hman ah hian March 1-a a hawnna neih a nih hnuah March 2 leh 6 khan Gender Sensitization chu Aizawl-a College pahnih ah neiin Hmeichhia leh mipa-te intluktlanna thu bakah Mission Shakti Scheme hnuaia Sub-Scheme hrang hrangte chu sawizauna neih a ni a, March 3-a Chapchar Kut hmanna ah khan Photo Booth siam a nih bakah International Women's Day puala thuziak siamte chu Zirna In hrang hranga semdarh tura tih niin Video Clip in siam siakna te neih a ni bawk.