1st Bn. MAP Ground-a Synthetic Football Turf leh Gallery siam thar Chief Minister in a hawng

Chief Minister Zoramthanga chuan nimin khan 1st Bn. MAP Ground, Armed Veng Aizawl-a Synthetic Football Turf phah leh Gallery siam chu hawngin, Covid buaina karah sawrkarin theihtawp a chhuahna rah chu tun hun ah lo thleng ta tih a sawi.

Khelo India Scheme leh SEDP atanga sum hmuh cheng nuai 1,375 hmanga 1st Bn. MAP Ground, Armed Veng-a Synthetic Football Turf phah leh Gallery siam hawnna hunah hian Chief Minister chuan Fotball Ground changtlung tak bakah hmun danga kan la neih ngai loh Gallery hnuai lama In lian tha tak, tangkai taka hman theih tur nena ruahman hawn a ni ta chu lawmawm a tih thu a sawi a. Kum hmasa lama khawvel pum chu Covid natna in tuam velin, inkharkhip ngaia hmasawnna hna pawhin nasa taka a tawrh hnuah, a theihna apiangah a remcham dan ang anga sawrkarin hma a lakna rah pakhat Vawiin a a lan tak thu a sawi a. Indopui laiin ram thenkhatah chuan haw lehna tur chenna In pawh neilo khawpin chhiatna a thlen dan leh chuti chunga tumruhna nen intung ding leh a, ram hausa leh changkang ber ber a an insiam dan sawiin Chief Minister chuan, chhiatna te hi a aia ropuia dinchhuah leh theihna a nih thu a sawi bawk.

He hunah hian Home Minister Lalchamliana pawhin Aastroturf phah leh a sira a behbawm tur nen tha taka peih a ni ta chu lawmawm a tih thu sawiin, thalaite infiamna lama an tuihalna hria in sawrkarin an tan hma a lak thu a sawi a. Sports Minister Robert Romawia Royte pawhin 1st Bn. MAP Ground tihchangtlun chungchangah Sports Department leh Police te chuan thawhhona tha tak nen hma an lak hi thu a sawi bawk.

1st Bn. MAP Football Ground, Armed Veng, Aizawl siamna atan hian Nov. 25, 2019 khan Khelo India Scheme atangin cheng nuai 500 hmuh a ni a, Décor India Complete Sports Solution, G.S. Road, Guwahati chu hna thawk tura thlan niin Field thlanglam zauhna atan SEDP atangin cheng nuai 425 leh Khelo India Scheme atangin cheng nuai 450 hmuh leh a ni a, a vaiin cheng nuai 1375 hmuh niin kumin Feb. 28 khan hna hi zawhfel a ni.

He hna thawhna ah hian Field zauh leh Gallery siam bakah Synthetic Football Turf phah te, Pavillion sak te leh a hungna siam te pawh a tel bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man