Tuichang lei hmang tan ta

Keitum leh Khawlailung inkar Tuichang lui a Lei dawh thar chu nimin atang khan lirthei zawh theih tura hawn a ni ta. Hrangturzo East leh West Block MNF hruaitute chuan he Lei dawh hna thawh mek hi nikum Krismas dawnah tlawha hnathawktute nen inremna an siam hnuah inremna anga thil a kal tak loh avangin nimin khan helai hmun hi an tlawh leh a, he hunah hian mi 70 vel zet kalin buaina thleng palh thei thu ah SDO (Civil) North Vanlaiphai Beitlotha Nohro bakah Police hotute pawh an kal bawk a, hei bakah hian Serchhip atangin PWD hotute pawh an kal bawk a, Hrangturzo Block MNF hruaitute chuan he Lei hi zawhfel thuai an phut thu leh mipuite hman tangkai theih tura hawn thuai an phut thu an sawi a ni.

Hetianga Lei dawh hna te enfiah a nih hnu hian inremna siamin nimin atang khan Lei an dawh thar hi lirthei eng chi tan pawha zawh theih tura hawn nghal a ni a, chawlhkar khat chhung hawn phawt tura ruahman niin hemi hnu hian Contract a tel Load Test pawh neih tura tih niin hei vang hian ni thum chhung vel khar leh a ni ang. Hei bakah hian Lei-a kaina tur kawng siam hna thawh chhunzawm turah pawh lirthei kal tibuai lo turin kawng zatve zatve-a insiam-chhawk tura tih an ni a, Lei dawh thar-a tlan lirthei te chu darkar khat-a km 20 (20kmph) aia chaka tlan lo tura tih ni thungin lirthei lian leh rit phur te chu a ruala tlan a la rem dawn lo a, lirthei te chi erawh khuahkhirhna a awm lo thung a. Lei-ah hian lirthei din phal a ni rih lo bawk.

Lei dawh hna a tul zawng zawngte hi tun thla ni 15-ah chuan zofel vek turin hnathawktute chu tih an ni bawk a, February 16 atang chuan he Lei hi dan anga hman chhunzawm theih tura ruahman a ni.