Serchhip-ah lirthei khu enfiahna tur hawngin Vawiin atangin Test kalpui a ni ang

Serchhip-a lirthei khu enfiahna tur, Kawlni Auto Exhaust Emission Testing Station Pvt. Ltd. chu nimin khan Serchhip Dinthar Veng-ah Serchhip DTO C. Lalawmpuia chuan a hawng a, tukin dar 9:00 atangin test kalpui a ni ang.
    Mizoram sawrkar chuan Mizoram-a lirthei khu enfiahna te mimal enkawlna hnuaia kalpui turin Tender a tichhuak a, hemi ang hian Serchhip-a Pollution test kalpui tur hian Kawlni Auto Exhaust Emission Testing Station Pvt. Ltd. (Prop. Lalnghinglova Kawlni) chu nikum December 19 khan thlan a ni a, Build, Own, Operate (BOO) behchhana inremna siam niin, hemi atan hian kum 2 chhung atana thawhdunna thuthlung (MoU) ziah a ni bawk a. Transport Department chuan lirthei khu endikna khawl Smoke Emission Analyser Petrol Engine leh Diesel Engine pakhat ve ve leh tul dang pe in an enkawl zui dawn a ni.

Nimin khan Serchhip DTO C. Lalawmpuia chuan Kawlni Auto Exhaust Emission Testing Station Pvt. Ltd. hi hawngin Serchhip mipui ten Pollution Test theihloh avanga hun rei tak harsatna kan tawh sutkianna tura Pollution Testing Station hawn a ni ta chu lawmawm a tih thu a sawi a. Meikhu leh motor khu avanga ramchhung ah harsatna a thlen nasat mek zel avangin sawrkar laipui pawhin Pollution Test hi a ngaih pawimawh thu leh Motor chetsualna avanga insurance claim turte tan pawh tunah chuan Pollution Test paltlang tih hriatna Certificate an phut zel tawh avangin lirthei neitute pawhin an ngaih pawimawh a tul thu a sawi bawk.

Serchhip DTO Office-a MVI Lalrohlua pawhin Motor Register reng reng kum khat hnuah Pollution Test neih a tul thu sawiin, dan zawm lo chu vawi khat man ah Thla 3 tan emaw, Rs. 10,000/- chawi tur emaw a hrem theih niin vawi thum manna ah chuan Driving license cancel thlenga hrem theih a nih thu a sawi a. Serchhip Traffic Police OC Jessie Zaithan-mawia pawhin India ramah Dan siamthat a nih hnuah Dan zawmlo hremna a san zel avangin mipui ten Dan zawm ngaih pawimawh a tul thu a sawi bawk.