Latest News

Serchhip District-a SEDP tanpuina dawngtu ten hma an la tha thawkhat nia hriat a ni

Nimin khan Serchhip-ah District Level SEDP Committee chu thukhawmin Family Oriented SEDP tanpuina dawngtute hmalak dan an thlirho a, tanpuina dawngtute hian an sum dawn ngaihtuahin hma an la tha thawkhat nia an hriat thu sawiin, tanpuina dawngtute hmalakna enfiah kawngah Village Committee te tan lehzual a ngai tih tarlan a ni.

Serchhip DC Meeting Hall-a District Level SEDP Committee thutkhawm hi Serchhip Addl. DC Lalmuansanga Ralte chuan kaihruaiin Mizoram sawrkar in Family Oriented SEDP kalpui mek chungchangah hian sawrkar chuan a tihtur tiin mipuite hnenah tanpuina semchhuah a nih tawh thu leh la semchhuan chhunzawm zel tur a ni dawn tih a sawi a. Tunkar tawp-ah hmalakna hrang hrang thlirin Aizawl-ah thutkhawm neih a nih dawn thu leh chumi inbuatsaihna atan chuan he thutkhawm hi koh a nih thu a sawi a. He Committee-a tel Prominent Citizen leh Line Department te chu he hmalakna hnuaia tanpuina dawngtute hmalakna an hmuh dan zawtin, duhthusam ang vek ni lo mah se tanpuina dawngtu te hian hma an la tha thawkhat nia a lan thu Addl. DC chuan sawiin, tanpuina sum hlawm a len loh avangin lian taka hmalak a harsat thu a sawi bawk.


He Committee a tel Prominent Citizen te chuan tanpuina dawngtute hmalakna an hmuh chinah hmalakna a tha thawkhat nia an hriat thu sawiin, lian taka hma la turin sum an dawn te a tlem deuh avangin thil harsa a nih thu leh pawisa an dawn zat en chuan hmalakna te chu tha thawkhat nia an hriat thu an sawi a. A bikin ranvulh lamah chuan hmalakna a tha thawkhat hle nia an hriat thu pawh an sawi bawk.

Hemi hnu hian Line Department hrang hrangte chuan an Department hnuaia SEDP kalpui a nih dan tlangpui tarlangin, Fisheries Department chuan an Department hnuaiah mi 111 ten tanpuina dawngin an zinga 53 te chuan Sangha Dil lai zo tawhin 35 in an lain mek thu leh la lai tan thei lo 23 an awm thu an sawi a, heng zinga thenkhat te chu khawl lama harsatna nei te an nih thu an sawi bawk.


Sericulture Department chuan an Department hnuaiah tanpuina dawngtu mi 21 an awm thu sawiin, a tlangpuiin Pangang khawi lama hma lo la tawh te an nih avangin hma an lak that thu leh Pangang khawi thar turte tan erawh bul tan hun chauh ala nih thu an sawi bawk.

AH&Vety Department chuan an Department hnuaiah tanpuina dawng 1746 an awm thu sawiin, hma an lak tan vek tawh thu leh a then chuan tharchhuah an neih tawh laiin a In sa lai mek te pawh an la awm thu an sawi a. Land Resources, Soil & Water Conservation Department chuan an Department hnuaiah mi 42 ten tanpuina dawngin Lo vah a hun chauh avangin hei hi tanpuina dawngtute thlen chin a nih thu an sawi a. Commerce & Industry Department chuan an Department hnuaia tanpuina dawngtu mi 937 te chuan hma an lak theuh tawh thu leh an hmalakna thlen chin erawh a inang lo hle tih an sawi a. Dawr siam thlang ten hma an lak that thu an sawi bawk.

Agriculture Department pawhin mi 896 ten an Department hnuaiah tanpuina dawngin tanpuina dawngtu zingah a rah seng tawh an awm thu an sawi a. Horticulture Department in tanpuina dawngtu mi 698 neiin hma an la tan vek tawh tih an sawi bawk a, UD&PA Department in an Department hnuaiah tanpuina dawng mi 49 awmin heng mite hian hma an lak tan tawh thu an sawi bawk.

He thutkhawm ah hian tanpuina dawng-tute hmalak dan enfiah chungchangah Village Level Committee ten uluk lehzualin hma la se an duh thu sawiin, Department ten an hnuaia tanpuina dawngte atangin mi hlawhtling zual mi 10 vel thlanchhuah nise an ti bawk.

Comments

Popular News (Last 30 Days)