Ramri kaltlanga insumdawntawnna mumal zawka kalpui turin India lam a inhawn reng - Governor

Champhai District tlawha zin Governor Hari Babu Kambhampati chuan ruihhlo leh dan lova thil tih manchhuah kawnga Assam Rifles-te hnathawh fakawm a tih thu sawiin, Ramri kaltlanga insumdawntawnna mumal zawka kalpui turin India lam a inhawn reng thu a sawi bawk.

Mizoram Governor Hari Babu Kambhampati hian nimin khan Champhai leh Zokhawthar-a Company Operating Base-te bakah Zokhawthar Land Customs Station te tlawhin India leh Myanmar inrina a Lei dawh, Indo-Myanmar Friendship Bridge leh Border Pillar-te a tlawh bawk a, he hunah hian ruihhlo leh dan lova thil tih manchhuah kawnga Assam Rifles-te hnathawh leh khawtlang mipuite hmakhua ngaia an hmalakna te fakawm a tih thu a sawi a. Mizoram Governor anih hnuah Assam Rifles-te hmalakna chu an hotute leh Media kaltlanga a hriat fo thu sawiin, thurualpui dangte nena tang tlanga khawtlang himna kawnga an hmalakna te fakawm a tih thu a sawi a. Ramri ven leh ramri kaltlanga dan lova thil tih do kawnga hmalakna ah khawtlang mipuite nena inzawmna tha tak an nei leh, an tana rawngbawl sak kawnga an hmalakna chuan North East mite tana thian tha an nihna a tarlang a ni, a ti a. Health Camp an neih thin te, abik takin Lung lama harsatna neite enfiah kawnga an hmalakna te chhuanawm a tih thu a sawi bawk.

Ramri kaltlanga insumdawntawnna mumal zawka kalpui turin India lam a inhawn reng thu leh dan anga kalpui turin lehlam an inpeiha hmalak dun a pawimawh thu pawh Governor chuan sawiin, Khawtlang mipuite leh Assam Rifles-te chu inpawhtlang taka awm a, mamawh an neihte inpawhtlang taka sawiho thin turin a chah a. Zokhawthar khawtlang hruaituten a hnena mamawh an thlen, ATM leh Health Facility tihchangtlun bakah tul dangte tihpuitlin anih thuai theih nan a tul angte bawhzuia hma la turin Line Department Official-te a chah a ni.

Governor hian 42 Assam Rifles hnuaia Company Operating Base (COB) Champhai leh Zokhawthar-te tlawhin Lt. Col. JS. Sodhi, 2nd IC, 42 Assam Rifles Battalion leh a ho ten an lo dawngsawng a, ramri ven leh dan lova ramri kaltlanga thil tih ven kawnga an hmalak dante an lo hrilhfiah a. Indo-Myanmar border thui tak awmna Champhai District-in India ram tan pawimawhna thuk tak a neih thu leh ramri awlsam taka daikai mai theih a ni leh thenawm ram buai vanga harsatna thlengte an tarlang bawk.

Indo-Myanmar Border veng turin Indian Army-te chu kum 1958-ah dah niin an kut atang hian Assam Rifles ten kum 1968-ah mawhphurhna an la a, sqkm 4,501 a zau an veng a ni. Champhai District chu hmun ralmuang tak anih thu leh Police, Administration, Customs, Excise leh NGO te nen dan lova thil tih do kawngah lungrual taka hmalak ho thin anih thu te bakah khawtlang mipuite nen thawhhona tha zawk leh inpawhtlanna vawnnun nan training, Sports, Health Camp leh tul dangte buatsaih anih thin thute an tarlang bawk.

Governor hian Zokhawthar-a Land Customs Station (LCS) pawh tlawhin Superintendent KM. Donglian leh a thawhpuiten an lo dawngsawng a. Ramri kaltlanga sumdawnna leh an hnathawh dante Governor hi an lo hrilhfiah a. LCS chhunga Banking facility awm SBI Zo-khawthar pawh tlawhin Lead District Manager JM. Soren leh thawktu dang ten an lo dawngsawng a. Pradhan Mantri Awas Yojana - Housing for All (Rural) hnuaia hamthatna dawngtu Zokhawthar khua-a mi te leh Pradhan Mantri Ujjwala Yojana (PMUY) hnuaia ham-thatna dawngtute a tlawh nghal bawk a ni.