Sawrkar hnathawk ten lungawiloh lantir dawn

Mizoram-a sawrkar hnathawk inzawmkhawmna, Federation of Mizoram Government Employees & Workers (FMGE&W) chuan March 6 leh 7 atang khian lungawilohna lantir an tum.

    FMGE&W hian Feb. 1, 2023-a Council Meeting neih in a lo rel tawh angin Mizoram sawrkar Notification dinglai anga Dearness Allowance pek an phut nan leh sawrkar Dan anga a hun taka hlawh pek zel an phut nan lungawi-lohna hi an lantir dawn a. Sawrkar hnathawk pension kum, kum 62 ni tura an dilna pawh sawrkar hotu ten an tiam tawh anga ngaihtuah sak thuai an phut thu an sawi bawk. FMGE&W ten ruahmanna an siam dan chuan March 6 leh 7 khian Pen/Tool down Strike an nei dawn a, March 9 leh 10-ah Mass Casual Leave la lehin heng te hian awmzia a neih loh chuan March 13-ah Council Meeting an nei leh dawn a ni.