Lung In tang tur leh cheng nuai 20 chawi turin ti

Tuirial Hydel Project dinna tur ram lak-a zangnadawmna felhlel thubuaia thiamloh chantir mi 6 te chu lung In tang tur leh cheng nuai 20 theuh chawi tura an chungthu rel a ni.

    Tuirial Hydel Project siamna atana ram laksak te zangnadawmna pek chungchanga niminpiah a Special Court (Prevention of Corruption Act), Mizoram Aizawl in thiamloh a chantir tak mi 6 te hremna hi nimin khan Court chuan puangin heng mi 6 te hi Section 420 r/w 120B IPC angin kum khat theuh lungIn tang tur leh cheng nuai 10 theuh chawi tura tih niin Section 467/468/471 r/w 120B of IPC angin kum khat theuh lungin tang tur leh cheng nuai 10 theuh chawi turin tih an ni a. Amaherawh chu tunhma lamin Court-ah thiamloh chantirna thubuai an la neih loh avang leh kum lama upa, dan bawhchhe nawn tawh loh tura ngaih an nih avangin lung In-a an tan hunchhung tur hi kalkaawp tura tih a ni a, hei vang hian kum khat theuh lung In tang tur leh cheng nuai 20 theuh chawi tura tih an ni a. Pawisa chawitur hi an nei lo a nih chuan kum sawm (10) dang lung In tan belh tura tih an ni bawk.

Tarlan tawh angin Special Court (Prevention of Corruption Act) chuan ram laka thil diklo ti a puh mi 9 zinga mi 6- C. Vanlalchhuana (Electric Veng, Aizawl); Saiaithanga (Tuithiang, Aizawl); C. Rokhumi (Durtlang, Aizawl) Lalduhawma (Durtlang Leitan); K. Lalrawna (Champhai Bethel) leh PC. Lalthazovi (Durtlang Leitan) te chu inthurual tlanga VC ram pass lem siamna a inhnamhnawihah te, VC ram pass lem hmanga zangnadawmna an dawn theihna atan sawrkar a thuneitute bumah te, VC ram pass lem a dik ang taka lantira zangnadawmna dawnga puhnaah te thiamloh a chantir a ni.