Mizoram-a kawng laih mek leh laih tur sawifiah

Mizoram chhunga NHIDCL hnuaia kawng laih hna thawh mek leh a kaihhnawih hrang hrangte chu Union Minister of Road Transport and Highway Nitin Jairam Gadkari chuan zawhna chhangin a sawifiah.

    Parliament Session neih mekah Mizoram Rajya Sabha MP K. Vanlalvena zawhna te chhangin Union Minister of Road Transport and Highway Nitin Jairam Gadkari chuan Silchar - Aizawl Four Lane laih bul tan mekah Vairengte leh Kolasib inkarah mi 480 hnena zangnadawmna pek tawh chu cheng vbc. 281.73 a nih thu leh Kolasib - Sairang inkar zangnadawmna erawh tihfel a la ni lo tih a sawi a. Silchar - Aizawl Four Lane kawng laih tur hi Package 8-ah then niin Package 2 chu Assam NHIDCL kutah dah a ni a, Package 6 chu Mizoram NHIDCL kutah dah a ni thung a. Mizoram chhung Package 4-ah hna thawktu tur Contractor thlan fel tawh niin cheng vbc. 2369.35 sanction tawh a ni tih a tarlang a. Kawnpui - Sairang package 2 chu DPR siam mek a ni bawk.

Zawhna ziaka a chhannaah Union Minister chuan Mizoram chhungah Two Lane kawngpui thlur 4 laih mek a ni tih pawh a tarlang a, km 380-a thui Aizawl - Tuipang chu cheng vbc. 7280.95-a thawh mek niin km 98.57-a thui Aizawl - Imphal via Ngopa Two lane road chu cheng vbc. 1517.60-a thawh mek a ni a. Km 119.95-a thui Seling - Champhai chu cheng vbc. 2279.74-a thawh mek a nih bakah km 74.95-a thui Lunglei - Tlabung Two lane road pawh cheng vbc. 1439.03 in NHIDCL hnuaiah Contractor hrang hrang ten an thawk mek a ni.