Tun dinhmunah UCC hman tumna awm lo

Mizoram Rajya Sabha MP K. Vanlalvena zawhna chhangin tun dinhmunah Uniform Civil Code (UCC) hman tumna engmah a awm lo tih Union Law and Justice Minister Kiren Rijiju chuan a sawi.

Sawrkar thuchhuah in a tarlan danin tunlaiin India ram hmun hrang hranga Hnam hnufual zawk leh Sakhaw tenau zawk te zingah India sawrkarin Sakhaw tin leh Hnam tinte hrûtrualna tur dân, Uniform Civil Code (UCC) hman a tum niin thu a thang nasa hle a, hemi chungchangah hian Mizoram Rajya Sabha MP K.Vanlalvena chuan Union Law and Justice Minister Kiren Rijiju chhan atan zawhna a siam a ni.

He zawhna chhanna ah hian Union Minister of Law and Justice Kiren Rijiju chuan, India sawrkar chuan 21st Law Commission of India hnenah Uniform Civil Code in a nghawng theih tur thil chi hrang hrang te lo zirchiang a, chumi zulzuia rawtna siam turin ngenna a lo thlen tawh thu te, Law Commission hotute chuan 21st Law Commission of India term chu August 31, 2018-ah a tawp tawh thu leh 22nd Law Commission in a la ngaihtuah zawk tur nia a lan thuin an rawn chhang a. “Hemi a nih avang hian tun dinhmunah Uniform Civil Code hman tumna engmah a awm lo,” tiin nimin khan K. Vanlalvena zawhna hi ziakin a chhang a ni.