Central YMA hruaitu ten Assam Rifles ram luah chungchang Revenue Minister an sawipui

Aizawl khawpuia Assam Rifles ram luah chhunga mimal ram neite LSC cancel tura Guwahati High Court-a Public Interest Litigation (PIL) an thehluh chungchangah Central YMA hruaitute chuan nimin khan Revenue Minister Lalruatkima chu a Pisa-ah an kawm.

    Revenue Minister an kawmna ah hian Central YMA hruaitute chuan Assam Rifles ram luah chhunga dan kalha LSC pekte cancel tura Cabinet Meeting-in kum 2019 kumtir lama hmalak a lo remti tawh chu lawmawm an tih thu sawiin, Assam Rifles ten an chhuahsan tur ram hi mimal hnena pek leh sahthlak chu Central YMA chuan rem a ti ngai dawn lo tih an sawi a. He ram hi Mizo mipuite tana thil tha leh rotling siam nan a tawp thlengin beih an tum thu leh Joint NGO Coordination Committee pawhin hun kal tawhah khan Assam Rifles ram luaha mimal ram neite chu surrender turin an lo ngen tawh bakah helai hmuna LSC neite chu an LSC kawl reng lova sawrkara pe let turin an ngen tawh thute, an ngenna a hlawhtling lo nia an hriat vangin High Court-ah kum 2020 khan PIL thehlut an nih thu leh reiloteah Court Hearing neih a nih an beisei tawh thu an sawi a, ram neituten an neih dan hi a felfai lo hle nia an hriat thu sawiin, mimal ram neite cancel sak tura sawrkarin hma a lak tawhna lawmawm an tih thu an sawi bakah tun aia sawt lehzuala hmalak dan a awm theih beiseia Minister hi hmu an nih thu an sawi a ni.

Revenue Minister Lalruatkima chuan Central YMA hruaitute chu tha taka lo dawng-sawngin hun rei tak atang tawh Chief Secretary lo awm tawhte kaihhruaina hnuaia Revenue Department leh Home Department in hma an lo lak tawh dan leh an bawhzui dante a lo hrilhfiah a, “Mimal leh pawl anga kan duhdan leh ngaihdante dah bo a ram leh hnam tan a ni tih hriaa ram leh hnam tana tha tur ber thlir chunga rilru zau tak helai hmuna ram neitute leh Central YMA te bakah sawrkar pawhin kan put theih a pawimawh hle a ni,” a ti a. Mi zawng zawng kan tan tlan a pawimawh a, sawrkar pawhin hmathlir thui tak neiin helai hmun hi thangtharte leh Zoram tana rotling ni tura tuaihnum a duh tih sawiin, hemi hre reng hian Land Revenue & Settlement Department pawhin Session kallai mekah ‘The Mizoram (Restriction on use of Transferred lands) (Amendment) Bill, 2023’ pawh ngaihtuah turin a pulut tih a sawi bawk.

He hunah hian Revenue Secretary R. Zarzosanga leh Director K. Laldingliana bakah Department Officer dangte pawh telin zau tak leh inhawng taka inkawmin hmalak dan turte an sawiho a ni.