Lengte leh Saitlaw-a Mau chinna hlawhchham niin sawi

Congress Thalaite chuan Lengte leh Saitlaw ram-a Mau chinna hmun chu a hlawhchham niin an sawi.

    Nimin-a thuchhuah an siamah MPYCC chuan MNF Returnee tena Mau tiak an phunna hmun, Lengte leh Saitlaw ram chu niminpiah khan MPYCC Information & Publicity Deptt te chuan an tlawh thu leh, chanchinthar-a an lo puanzar tawh ang leh an insawi angin heng lai hmunah hian Mau puitling hmuh tur a awm miah lo niin an sawi a, “A thlawna Sawrkar sum luanralna leh sum siamna chiang tak tih MPYCC chuan kan finfiah a, he Project hi a hlawhchham let der a ni tih kan puang,” an ti.

MPYCC chuan RTI Act hmanga zawhna Horticulture Department-in an chhàn danin, Mau/Raw tiak chi thum phun tir a nih thu leh kum 2020 atangin loneitute hnenah Mau/Raw tiak 8,49,425 semin, a tiak leina atan cheng vbc. 6.48 an sên tawh bakah Link Road laihna atan sum engemaw zat sen a ni bawk tih an sawi a. Heti chunga mau puitling tha pakhatmah an siamna hmuna an sawi, Lengte leh Saitlaw ramah hmuh tur a awm miah lo chu mak an tih thu leh Sawrkar sum awmze nei lova luanralna dik tak a nih thu an tarlang a ni.