ILP hman leh pekchhuah danah fimkhur turin ngen

Mizo Zirlai Pawl (MZP) chuan India danpuiin a bik taka min humhalhna dan, Inner Line Permit (ILP) a nihna ang taka hmang tur leh a pekchhuah dan chungchangah pawh fimkhur lehzuala kalpui turin thuneitute an ngen tih an sawi.

    MZP hian Inrinni khan Aizawl khawpuia Kawn hrang hrangah hnamdang dan lova khawsa dapchhuah hnatlang neiin, Inner Line Permit (ILP) nei lo mi 37 bakah kumtling lo hnathawka chhawr thahnem tak hmuhchhuah niin thuneitute kutah hlan nghal an nih thu an sawi a. Sawrkar leh thuneitute pawhin theihtawp chhuaha hma an lak mek laia ni khat hnatlanna a hnamdang permit nei lova khawsa leh dan lova sumdawng thahnem tak manchhuah tur an awm chu pawi an tih thu sawiin, heng hnamdang dan lova khawsate hi permit neilo bakah Permit dam hun chhung zo tawh te an ni tih an sawi.

MZP chuan India Danpui-in a bik taka min humhalhna dan, Inner Line Permit (ILP) chu a nihna ang taka hmang tur leh a pekchhuah dan chungchangah pawh fimkhur lehzuala kalpui turin thuneitute ngen nawn lehin, Mizoram chhunga Veng/Khua Local Council/Village Council thuneitu zawng zawngte pawh hnamdang ILP issue chungchangah document felfai lo chu hriatpuina lehkha pechhuak tawh lo turin an ngen bawk a. MZP chuan hnamdang dan lova khawsa a hmuhchhuah te chinchang chu ngun takin a enzui dawn thu leh thawnkir (push back) an nih dan pawh an enzui dawn tih an sawi a. Mizoram chhunga dan lova hnamdang sumdawng te dapchhuakin a tul angin hma an lak zel dawn thu leh hnamdang dan lova Sumdawngte dapchhuah kawngah Zoram mipuite thlawpna a ngen thu an tarlang bawk a ni.