House-ah Supplementary Budget pharh a ni

Chief Minister Zoramthanga chuan Sawrkar kum thar 2023-24 chhunga Mizoram Budget ruahman nimin-a a phar rualin, sawrkar kum kal mek 2022-23 chhunga Sawrkar sum indaihlohna phuhrukna tur, Supplementary Demand a pharh nghal.

    Chief Minister-in Supplementary Demand a pharh taka sawrkar sum indaihlohna chu cheng vbc. 3,265.69 a ni a. Demand pharh paha thu a sawiah Finance changtu nibawk Zoramthanga chuan, Sawrkar laipui atangin State Sawrkar chuan Scheme hrang hrang, ruahman thar leh kalpui lai mekte kalpuina atan sum thahnem tak a dawng thin a, hetiang a nih mek lai hian Budget ruahman a nih laia hriat lawk loh sum hmanna tur hrang hrang State Fund atanga pek tur dilna dawn thin a ni a, hemi piah lamah hian State sum atanga mamawh tlachhawp hrang hrang tihlawhtlinna tur sum ruahman a ngai thin tih a sawi a. Chung zingah chuan ramri buaina kaihhnawiha sum hman te, PHE tui pump-na te, ZMC enkawlna leh thil dang tam tak awm tih a sawi a, hengte avanga Sawrkar sum ruahman sa indaihlohna phuhrukna tur Supplementary Demand cheng vbc. 3,265.69 chu House pawmpui turin a chhawp chhuak a ni. Supplementary Demand hi Vawiin rorel inkhawmah sawiho a pass tum a ni dawn a ni.