Hnathawh hunchhung a tawi tih hi hmasawnna kawngah kan thanmawh bawk a ni - Governor

Mizoram Governor Hari Babu Kambhampati chuan Mizoram-ah hnathawh hunchhung a tawi tih chhuanlama kan hmang reng chu hmasawnna kawngah kan thanmawh bawk a nih thu a sawi.

    Governor Hari Babu Kambhampati hian nimin khan Khawzawl DC Conference Hall-ah Khawzawl-a sawrkar Department hrang hrang hotute kawmin kawngpui laih leh hmasawnna ruhrel khawih mek te chu a hun takah thawh zawh a pawimawh thu a sawi a. “Project pakhat thawh rei lutuk avangin Project tha tak tak tam tak kan chan thei a. Hetiang thil kan tih fo hian beneficiary te chanvo kan hup bet tih kan hriat a ngai,” a ti a. “Mizoram-ah hnathawh hunchhung a tawi tih hi kan hriat na a rei tawh a, he thil in bumro tir loh dan zawng si lo a, chhuanlam atan kan hman reng hi a fuh lo a, hmasawnna kawngah hei hi thanmawh bawk a ni,” a ti bawk.

Governor Hari Babu Kambhampati chuan Khawzawl District chu District naupang tak a ni chungin kawng tinrengah hma a sawn nia a hriat thu sawiin, Faina chungchangah midangte entawn an ni mek chu chhuanawm a tih thu a sawi a. Agriculture leh Horticulture huanga hmalakna te leh Nizung chakna hmanga Kawlphetha siamchhuah hna buaipui mek te chu tha a tih thu sawiin, Kawlphetha mamawhna a san avangin Nizung chakna ringa Kawlphetha siamchhuah lamah mipui zirtirna pek tam a ngaih thu leh Solar Rooftop - on Grid chungchang leh a thatna te mipui hnenah zirtirna nasa zawka pek a ngai tih a sawi bawk.

He hunah hian Khawzawl District Bawrhsap C.C. Lalchhuangkima chuan District mipuite aiawhin Governor Dr. Hari Babu Kambhampati lawmna thu sawiin, Khawzawl District chanchin kimchang a tarlang a, Khawzawl District hi August ni 12, 2019 khan siam niin Village Council 38 a awm mek a, Khawpui (Urban Town 3) leh Thingtlang (Rural Village) 26 a awm a. Khawzawl District Superintendent of Police Lalchhawnthanga chuan Khawzawl District venhimna kawnga police hnathawhte bakah dan leh thupek kenkawh kawnga District dinhmunte a tarlang bawk.