Mizoram-a Oil leh Gas zawn hna chak zawka thawh dan tur C&I Minister hovin ngaihtuah a ni
Mizoram-a Tuialhthei leh boruak alhthei (Oil leh Gas) zawn hna chu chak lehzuala thawh a nih theih nan nimin khan Commerce & Industries Minister Dr. R. Lalthangliana hovin thutkhawm neih a ni a. Tun dinhmunah Mizoram-ah Oil leh Gas beisei ang hmuhchhuah a la awm lo a ni.
He thutkhawm Secretariat Conference Hall-a neih ah hian Directorate General of Hydrocarbons (DGH), Oil and Natural Gas Corporation Limited (ONGC), Oil India Ltd., National Highways & Infrastructure Development Corporation Limited (NHIDCL) leh Mizoram PWD bakah Mizoram sawrkar atangin Commerce and Industries leh Geology & Mining hotute an tel a, Commerce & Industries Minister Dr. R. Lalthangliana chuan Mizoram-ah hun engemaw chen atanga tan tawh Oil leh Gas zawn hna chu chak lehzual zawka thawh a nih theih nan a mawhphurhtu Agency hrang hrang te kohkhawm an ni tih sawiin, thawhhona tha tak an neih theih nan leh Oil leh Gas zawn hna tibahlah thei thil hrang hrang te sawiho a, a chinfel dan ngaihtuah a, zalen taka inrawnkhawmna neih tul a tih avanga thutkhawm hi koh a nih thu a sawi a ni.
Kum 20 kalta vel atang khan Mizoram-ah Oil leh Gas zawn hna hi tan a ni tawh a. ONGC leh Mizoram Sawrkar chuan September 2003 khan a vawikhatna atan inremna thuthlung ziakin Kolasib, Mamit leh Aizawl District hmun thenkhata hma la turin thuthlung hi an ziak a. Meidum leh Zanlawn-ah Exploratory Well laih niin Meidum-ah hian Hydrocarbon hmuh a ni a, amaherawhchu sum-a chantir turin duhthusamin a tha tawk lo a. Zanlawn-ah erawh beisei ang hmuh a nih tak loh avangin ONGC hian an hna hi kum 2020 atangin an chawlhsan rih a. Hortoki-ah Exploratory Well dang verh leh tum niin Directorate General of Hydrocarbons (DGH) atangin phalna nghah mek a ni a, phalna hi pek an nih chuan hna pawh an tan thuai beisei a ni.
Oil India Limited OIL) leh Mizoram Sawrkar chuan kum 2007 ah thawhhona ziak lehin Serchhip, Hnahthial leh Aizawl District huamchhung hmun thenkhatah hma an la bawk a. Maubuang, Keifang, Thenzawl leh Phulmawi-ah te hmun 4-ah lei an verh tawh a, Pangzawl leh Thiltlang inkarah verh leh tum niin heta tan hian DGH phalna an la tawh a, February 2022 atanga January 2024 thlengin phalna pek an ni.
Heng bakah hian Assam – Manipur – Mizoram State pathum te intawhkhawmna ramri 255sqkm bial vela zauah ONGC in Oil leh Gas zawn hna a thawk mek bawk a. Mizo-ram lamah hian an beisei ang te an hmuh mai theih loh avangin hna chawlhsan rih a ni a. Hmalak chhunzawm an tum dan te meeting-ah hian zawhfiah an ni a. Mizoram leilung chu State thenawm te aia muk zawk leh laih har zawk a nih avangin hun a duh rei tih tarlan a ni a. Oil leh Gas zawn hna hi hun engemawchen an thawh hnuah pawh tun thlengin beisei ang hmuh la ni lo mah se data tam tak an lakkhawm theih phah a. Hei hian an zirchian zelna turah a pui dawn a ni. Oil India Ltd. leh ONGC te hian an data in hrilh hre tawnin a huho a zirchian lehzualna, Joint Study kalpui an tum tih he hunah hian an tarlang bawk a ni.
Oil exploration atan hian bungraw rit sak leh liantham tak tak thiarluh a ngaih thin avangin inkalpawhna kawng tha mamawh a ni a. Hei vang hian Mizoram PWD in Bailey Bridge an dawh lai mek chu chak zawka dawh zawh ni se tiin NHIDCL in kawngpui siam hna a thawh mek pawh leiverhna tur hmun panna kawngpui te chu siam zawh thuai a nih theih nan ngaih pawimawh bikah lo nei se tia hriattir an ni bawk.