P&E Deptt. in Prepaid Smart Meter la hmang thei lo

P&E Department chuan nikum (2022) December thla atang khan Mizoram-ah Prepaid Smart Meter hman tum mah se hman theih a la ni lo a, Meter thar hmang tur hian P&E Department chu an inbuatsaih mek a ni.

    Mizoram Power & Electricity Department thawktute sawi danin Mizoram-a Prepaid Smart Meter enkawl leh buaipui hna (Service provider) thawk tur hian Tender chhuah ni tawhin chhangtu pawh an awm a. Mahse, rate chungchang leh thil dangah sawi fel ngai neuh neuh a la awm avangin a buaipuitu tur pawh tihfel a la ni lo a. Mizoram ruala Smart Prepaid Meter hmang tura tih State dangte pawhin tunah hian an la hmang thei bik lo tih sawiin, thil thar anih avangin hmanhmawh vut vut a harsa niin an sawi bawk. 

Zawhna chhangin P&E Department thawktute chuan Mizoram-ah êng chhitu chhungkua (consumer) mi 29,000 atanga 30,000 inkar vel an awm thu leh heng mite hi meter thar vuahsak vek an ni dawn tih an sawi a. “Meter thar vuahna man hi consumer pakhat zelah Rs. 6,000 vel ni tura ngaih a ni a, meter man 22.5% (Rs. 1350) hi central-in a tum dawn a. A bak zawng hi kum 10 chhung zawi zawia rulh tur a ni,” an ti a. Prepaid Smart Meter hman a nih hun chuan mipuiten sum an seng tlem dawn thu leh Top-up thun chu thil harsa a nih loh thu an sawi bawk.

Sawrkar laipui hmalakna in Revamped Distribution Sector Scheme hnuaiah consumer meter zawng zawngte hi Prepaid Smart Meter-a thlak vek tura tih a ni a, State pariat - Jammu & Kashmir, Himachal Pradesh, Maharastra, Uttar Pradesh, Madhya Pradesh, Gujarat, Puducherry leh Mizoram te chu bultanna atan hman tum a ni.