Health Care-a inziahluhna hlawh ah kal tam

Zonuna Kawlni (LENKAWL) • February 15, 2023 • Comments • Mizoram

Tunhnai kum 2 (2021-22 leh 2022-23) chhunga Health Care Scheme-a inziaklutte Registration Fee chu Rs. 6,68,38,739/- a tling a, chung zinga a tam zawk chu Mizoram State Health Care Society (MSHCS) thawktute hlawh leh inrelbawlna atan hman a ni.

Nimin a Assembly Budget Session-ah Aizawl South-I bialtu MLA, C. Lalsawivunga zawhna Health Minister Dr. R. Lalthangliana’n a chhan danin, Policy Year October ni 1, 2021 - March 31, 2022-ah Health Care-a inziaklut te Registration Fee atangin Rs. 3,31,67,050/- hmuh a ni a. April ni 1, 2022 - March 2023-ah Rs. 4,96,73,240 hmuh a ni bawk.

Kum 2 chhunga hmuh Rs. 6,68,38,739 atangin thawktute hlawh (salary) ah Rs. 3,19,37,830 hman niin, Office Expenditure (Stationery, Internet, Telephone etc. ah Rs. 20,47,618/-, Motor hire-na ah Rs. 5,00,000/- leh Training/Meeting-ah Rs. 1,87,304 hman a ni a. Chungte bak Rs. 3,21,65,987 chu mipuite Health Care Bill atan hman a ni.

Health Minister sawi danin, Society sum hman dan chu Governing Board Council in a ngaihtuah a, Society in a hranpa a Administrative sum a neih loh avangin Rules fel tak hnuaiah, Dan hmangin an Administrative Expenditure atan phalna nei thlap a hmang an ni.

Health Minister chuan mamawhtute hman tur SEDP sum atangin tun Financial Year chhungin cheng vbc. 60 dawn a ni tawh tih a sawi a, chu chu chhungkaw tin hnen a sem ang zawng nilo in, chhungkaw pakhat in kum 1 atana an bill theih tur chin cheng nuai 2 an dahna zawk a nih thu leh Mizoram chhungkaw zawng zawng a sem lam a nih loh thu a sawi.