Football khelh chhunzawm a ni
Nimin-a inkhel hmasa berah Group B atangin Thangzuala Memorial FC Thenzawl in Sialsir chu 16-0 in an sawp leh a, Sialsir hian Hmar Veng FC lakah goal 16 bawk chhuahin match hnih ah goal 32 zet an chhuah a ni. He inkhel ah hian Thangzuala Memorial FC tan Lalawmpuia chuan goal 4 khungin Remsangpuia chuan goal thum a khung a, Ramdinsanga Hmar leh Lalhmingliana Kawlni ten goal hnih ve ve khungin Lalnunzira, Lalthlamuanpuia, Lalhruaitluanga leh A. Lalruatsanga ten goal khat theuh an khung a, Sialsir player Lalrinpuia chuan an lamah goal khat a tilut bawk.
Inkhel vawi hnihna ah Vengchung FC leh Chanmari FC te 3-3 in an inhnehtawk a, Vengchung FC tan Huntharnghaka chuan goal hnih khungin Lalhumhima chuan goal khat a khung a, Chanmari FC tan C. Lalrintluanga chuan goal hnih khungin Melvin Zomuana chuan goal khat a khung bawk.
Nimin-a inkhel hnuhnung berah Kawn Veng FC Chhiahtlang in El Ocho FC, North Vanlaiphai chu 4-3 in an hneh a, Kawn Veng FC tan B. Lallawmawma chuan goal thum khungin Lalmuankima chuan goal khat a khung bawk a, El Ocho FC tan F. Lalhriatpuia, Vincent Lalruatdika leh Lawmpuia ten goal khat theuh an khung bawk a ni.
Vawiin hian Group Match khelh chhunzawm leh tur niin Group Match khelh zawh a ni dawn a, inkhel hmasa ber zing dar 10:00-ah Chanmari FC leh Chhekhnai FC inhmachhawnin dar 12:00-ah El Ocho FC (North Vanlaiphai) leh FC Serchhip Kawnpui an inhmachhawn anga, chawhnu dar 2:00-ah Thangzuala Memorial FC (Thenzawl) leh Hmar Veng FC te an inhmachhawn bawk ang.
Comments
Post a Comment