Employment Exchange (EmpEx) Portal hawng

Zonuna Kawlni (LENKAWL) • February 1, 2023 • Comments • Mizoram

LESDE Minister Lalchhandama Ralte chuan thalai hna zawngte tana buatsaih Employment Exchange (EmpEx) Portal chu nimin khan a Office-ah a hawng.

ICT MSeGS nen tangkawpa siam Employment Exchange (EmpEx) Portal hi Employment Registration, Registration renew, hnaruak post apianga notification leh Skill Labour te tan hna zawnna a ni dawn a, Employment news-a en theih dawn bakah hnathawh tur nei tan awlsam takin hnaruak a post theih a, Employment Registration Card te chu Digilocker atanga download theih tura thlunzawm a ni bawk.

Employment Exchange (EmpEx) Portal hawn a lo ni ta chu lawmawm a tih thu LESDE Minister Lalchhandama Ralte chuan sawiin, Sawrkar Department bakah sawrkar hnuaia Corporation zawng zawng ten an hman tangkai tura hmalak zel tul a tih thu a sawi a. Mizoram Youth Commission-in hnathawh tur neite leh thawk duhte tana hman tur Portal a lo siam tawh thu leh tangkai taka hman a lo ni tawh tih sawiin, tunah hian Portal changtlung zawk siam a lo ni leh ta hi ram tan a lawmawm hle a, thalai hnazawng mekten an hlawkpui dawn a ni, a ti.