Electric Bill sang enfiah sak

Serchhip District Consumer Association chuan nimin khan P&E Department Serchhip Power Sub-Division Office-ah Electric Bill sang avanga mipui lungawi lo te lungawi lohna an enpui a, a tul anga hmalak zui an tum thu an sawi.
    Serchhip District Consumer Association hian mipuite hnena an lo puanzar tawh angin nimin khan Electric Bill-a lungawilo te tan Complaint an dawn sak a, he hunah hian mi thahnem tak pungkhawmin SDCA hruaitute chuan tun thla-a bill lo thleng hi December thla Bill anih avangin a hma aia a sang chu a hriatthiamawm an tih thu an sawi a. Amaherawhchu Bill sang uchuak tak tak tam tak a awm erawh chu tha lo an tih thu sawiin, hemi chungchangah hian mipuite chu an bill sang chungchanga lungawilohna an nei anih chuan inthlahrung lova Department lama complaint turin an ngen tih an sawi a. Department in an duh ang chhanna an pe lo emaw, bill sang lutuk chhan zawngchhuak tura kawng an hawnsak lo anih chuan Consumer Court-ah mipui aiawha din an inhuam reng tih an sawi.

 

Hei bakah hian Electric Meter mahni sum senga lei thenkhatte an bill-ah Meter Rent an la chawi thin ni a an hriat thu an sawi bawk a, Department lam hotute chu mipui atanga complaint a awm anih chuan a tul anga enfel sak a, Meter hi mipui ten an sum senga an lei anih chuan Meter Rent an chawitir thin hi tih-tawpsak turin an phut tih an sawi bawk.

P&E Department-a thawktute chuan Electric Bill-a lungawilo te tan Complaint hun hi Pisa kai ni apiangin chhun dar 12:00 thleng hawn a nih thu an sawi a. Meter Reader ten tihsual palh an neih ve theih thu sawiin, Bill hi complaint duh tan pe hmasa kher lova enfiah sak thin an nih thu an sawi bawk.